Mga hanig sa pagbalitok
Bisan sa gibalikbalik nga pasalig ni Presidente Ferdinand Marcos Jr. nga dili motabang ang iyang administrasyon sa International Criminal Court (ICC), gitawag siyang bangag ni kanhi Presidente Rodrigo Duterte ug giawhag nga magpa hair follicle drug test base sa gipagawas nga polvoron video.
Bisan sa pag-insistir nga suod gihapon silang managhigala sa presidente, si Bise Presidente Sara Duterte Carpio ni-resign sa gabinete, nitawag sa State of the Nation Address (SONA) nga katalagman ug nipasangil nga pamolitika ug pagbutang sa iyang pamilya sa kakuyaw ang pagkuha sa pipila sa iyang mga guwardiya.
* * *
Napakyas sa pagkumbinser sa mga Duterte ang mga deklarasyon ni Marcos sa makadaghang higayon nga wa kinahanglana ug sukwahi sa nasudnong sobereniya sa Pilipinas ang padayong pagsusi sa ICC sa laktod nga pinatyanay sa drug war sa kanhi presidente.
Sukwahi sa mga bulatik tali sa presidente ug bise presidente, ang mga Duterte nagduda sa kamatinud-anon ni Marcos. Ug duna silay sukaranan: Ang pagbisto sa Malakanyang sa P125 milyones nga confidential funds sa bise presidente sa 2022; ug kalit nga pagtangtang sa mas dako niyang confidential funds sa 2024.
* * *
Wa sab kaikyas sa mga Duterte ang mga hanig sa pagbalitok ni Marcos:
Resolusyon sa House of Representatives sa Nobyembre sa niaging tuig nga nag-awhag sa administrasyon pagtabang sa imbestigasyon sa ICC;
Legal briefer sa Department of Justice (DOJ) para sa presidente niadtong Mayo nga naglakip sa kapilian pagbalik pagpasakop sa ICC ug pagpadakop sa kanhi presidente;
Dungan nga pagsugod sa imbestigasyon sa House Human Rights Committee sa drug war ug pagtanyag sa nahipos nilang mga ebidensiya ngadto sa ICC; ug
Pagbisto ni Solicitor General Menardo Guevarra karong semanaha nga di nila supakon ang hangyo sa ICC Prosecutor pagpangutana nilang Senador Bato dela Rosa ug laing upat ka suspitsado sa imbestigasyon.
* * *
Si Guevarra, nga kanhi justice secretary ni Duterte, may pakaping kasayoran: Ang hangyo pag-interview sa mga suspek mahimong sundan sa pag-awhag sa prosecutor sa ICC sa pagluwat og arrest warrants batok sa mga sinumbong.
Dunay di mahimutang sa iyang moskitero sa Davao: Posible diay nga ang lapad nga lahugay sa kapolisan sa Davao gitumong batok sa mas dagkong isda kay ni Apollo Quiboloy.
- Latest
