Atraso ni Duterte sa Sugbo
Kaluod sa pangangkon ni kanhi Presidente Rodrigo Duterte, human namalandong og tulo ka semana sulod sa iyang prisohan sa International Criminal Court (ICC) sa The Hague, nga ang tanan niyang nahimo iyang gihimo para sa nasud. Unsay kaayohan sa nasud nga nahatag sa iyang extrajudicial killings (EJKs), Pharmally scandal atol sa pandemya sa Covid-19 ug pag-surender sa West Philippine Sea (WPS) ngadto sa China?
Kon duna man, kamubo kaha sa lista sa iyang mga nahimo para sa nasud. Segurong mas taas ang listahan sa iyang mga nahimo batok sa nasud.
* * *
Dunay mas maayong ideya ang usa sa viewers sa inadlaw namong programang ‘Baruganan’ sa YouTube. Gilista niya ang mga butang nga nahimo ni Duterte batok sa Sugbo.
Gipahunong ni Duterte, pinaagi sa iyang mga batabata nga gipangulohan ni kanhi Presidential Assistant Michael Dino, ang pagpatuman sa bus rapit transit (BRT) project sa Cebu City. Gipasalig nila nga pulihan og Light Rail Transit (LRT), Metro Rail Transit (MRT) ug monorail systems. Pero, nakatag-an ka, walay natukod nga bisan usa na lang ka haligi hangtod nga napupos ang ilang termino.
* * *
Gihinumdoman sab sa viewer ang laing atraso ni Duterte sa Cebu City: Ang pagpanghasi sa lokal nga eleksiyon sa 2019, nga nipatay sa pipila ka lider sa politika ni kanhi Mayor Tommy Osmeña sa bukirang mga barangay, nga gipasangil batok sa mga sinugo ni Duterte nga silang Koronel Royina Garma ug Heneral Debold Sinas.
Ang duguong maniobra nitunol sa liderato sa City Hall ngadto sa mga alyado ni Duterte nga gitulisok karong maoy responsable sa pagka-bangkarota sa lokal nga panudlanan.
* * *
Wala mahisguti sa viewer pero tuguting akong ipuno ang gipasalig ni Duterte nga pagtukod sa 74 ka kilometro nga Metro Cebu Expressway nga mosubay sa bukirang mga barangay sa Naga City, Minglanilla, Cebu City, Mandaue City, Consolacion, Liloan, Compostela ug Danao City.
Sama sa uban niyang mga pasalig sa pagbadlong sa ilegal nga drugas ug pangurakot sulod lang sa tulo ngadto sa unom ka buwan, ug mga taytayan nga magsumpay sa Sugbo, Bohol ug Negros Island, gipakyas ni Duterte ang mga Sugbuanon pinaagi sa abundang pagarpar ug nihit nga pundo para sa mga proyekto.
* * *
- Latest
