Luha sa pangandoy: A Lenten drama special

CEBU, Philippines — Sama sa naandan, mopasalida na sab ang  Cebu Catholic Television Network (CCTN) Channel 47 og Lenten Drama Specials o nagkalain-laing makatandog ug puno sa pagtulon-an nga mga drama karong panahon sa Semana Santa.

Usa na niini mao ang sugilanon nga nag-ulohan og “Luha Sa Pangandoy” nga ipasalida sugod karong adlawa, Abril 16. Ang sugilanon sinuwat ni Baby Omega-Flores ug ubos sa direksyon ni Wilnard Banzon. Nagtuyok ang estorya sa usa ka inahan nga mipili sa iyang personal nga damgo bisan pa sa risgo nga mawala ang iyang pamilya.

Si Myrna, nga gihatagan og kinabuhi ni Vanissa Keown, usa ka asawa ug inahan nga nakahukom motrabaho sa Hong Kong bisan pa man sa pagsupak sa iyang bana nga gidala ni Noel Carcueva. Kay matod pa sa iyang bana, wala ra man sila naglisod dinhi sa  Pilipinas ug dili na kinahanglang molarga sa laing nasud.  Apan tungod sa iyang personal nga pangandoy, milarga siya ug nakasinati og daghang pagsulay sa nahisgotang lugar.

Imbes makab-ot ang iyang mga damgo, nagkaproblema na nuon siya ug napriso sa  laing nasod. Tungod sa pakyas nga makakita’g tarong nga trabaho sa Hongkong, gitabangan nalang siya sa iyang mga kauban nga Overseas Filipino Workers (OFW) aron lang makauli siya. Apan sa iyang pag-abot dinhi sa nasud, giatake ang iyang bana ug namatay.

Ipasalida kini karong Abril 16 (7:00 -8:00 PM), Abril 17 (6:00-7:00 PM), ug Abril 19 (6:30 - 7:30 PM). Gawas sa CCTN Channel 47, makita sab kini sa pinaagi sa Facebook Live sa official Facebook Page sa maong estasyon.