Ex-GF ni Bro

Dear Tito Miguel ,

Ako diay si Ejay Earl , 18 anyos ug taga Barangay Sapangdaku , Cebu City . Wala pako kasuway nga nakauyab ko. Seguro, wala lang gyud koy naganahan kaniadto. Apan karong panahona , duna na ko'y naganahan nga girl . Apan naproblema ko , kay ex-GF man siya sa akong igsoon uy. Nagpakita pud baya og motibo ang girl nga ganahan pud siya nako. Nahadlok ko sa posibleng reaksyon sa akong igsoon if makahibalo siya nga naganahan ko sa iyang ex-GF. Usa ka tuig kapin na ang nilabay sukad sila naglabulag. Hinoun ang akong bro kay duna na'y laing uyab . Unsay ikasulti nimo Tito Miguel, ako ba ipadayon ang pagdiskarte sa ex-GF sa akong bro? — Ejay Earl

* * *

Ejay Earl,

Tinuod, dili maayo tan-awon ug paminawon. Mora mo’g gituhog sa usa ka babaye. Apan dili kini sayop, dugay na man sila nga  buwag sa imong igsoon. Ang sayop ka’y kun dungan mong duha. Apan karon, imong igsoon duna’y lain. Pero kun desidido ka manguyab, pangandam sa unsa’y posible mahitabo.

Una, lagmit dili makadawat imong igsoon. Kay magsige na hinuon siya’g hunahuna nga basin samtang sila pa, iyang uyab duna’y pagnanasa sa imoha. Ikaduha, daghang tawo mangutana’g mokondena ninyo duha, apil inyong mga higala ug pamilya, wa na gyud mo’y nakita nga lain nga gidaginot man ninyo ang usa’g usa? Lagmit sungogon pa ka, nga nikaon sa salin sa imong igsoon.

Ikatulo, bakikaw kaayo nga magkita mo sa imong igsoon kuyog ang uyab niya kaniadto ug uyab nimo karon. Mag-abot man gyud mo labi na’g duna’y okasyon. Bisan maglikay mo, duna gihapon higayon nga magbagat mo. Kun andam ka mosugakod ani tanan, mahimo nimong suwayan.

Apan unsa’y hinungdan nganong nagbuwag sila? Angay ka makahibawo, ka’y basin ang babaye ang sad-an, ikaw na sab ang usban. Ini’g human nimo’g pangutana sa imong igsoon ngano, ipaagi’g binuang, unsa kaha imong panguyaban? Kun masuko, ayaw na ipadayon, isip respeto sa imong igsoon. Kun mokatawa lang, bawi-a, ingna wa ka magbinuang. Tan-awa iyang reaksyon. Diha ka manukad unsa imong sunod buhaton. —Tito Miguel-

Magpatambag ka? Ipada kang Tito Miguel: 0991-318-9366