Dili pwede mosayaw

Naalarma si Minglanilla Mayor Rajiv sa video diin nakita ang mga foreign nationals nga nag-martsa sulod sa Minglanilla Highlands subdivision sa Barangay Tubod.  Sa imbestigasyon sa kapolisan, nasayran nga ang 61 ka langyaw, miyembro sa relihiyosong pundok nga gitawag og “Abayonaym” o “Those in Need of the Father.”  Usa sa nag-unang rason ngano nga misulbong ang gidaghanon sa lain-laing relihiyosong pundok mao nga adunay mga sakop nga wala makasabot sa ubang patakaran sa una nila’ng simbahan.  Matud pa sa akong kaila, “Mibiya ko sa akong una’ng simbahan kay dili ko kasabot ngano nga pwede ra mokanta atol sa misa apan dili pwede mosayaw.”  Madahaan!

 Malnourish ang kabataan

PASALIG si Presidente Marcos, Jr., nga mihimo ang kagamhanan og mga dinalian, decisive ug multi-sectoral nga aksiyon aron matubag ang malnutrisyon ug pagka-omeng sa mga batang Pinoy.  Dugang pa sa presidente, anaa na sa maka-alarma nga level ang malnutrisyon sa nagkalain-laing hut-ong sa kinabuhi sa nasud.  Dugay na’ng walay nakita nga tinuoray nga resulta ang katawhan sa giingon’g paningkamot sa kagamhanan.   Matud pa sa akong amigo, “Kon aduna ma’y nahimo ang gobyerno batok sa malnutrisyon, ang mga kongresista ug ubang opisyales ra ang naka-benepisyo kay sila ra man ang mitambok ug midagko ang tiyan.”  Muleeng!

Tasty, dili nasty

Gihangop sa comelec ang mga reklamo kabahin sa mga political dynasty kay makahatag kini sa ahensiya og kahigayonan aron matubag ug aron usab mahatagan og katin-awan ang mga legal nga punto kabahin sa isyu sa political dynasty nga motumaw matag eleksiyon.  Adunay mga personal nga rason ang mga kongresista ngano nga hangtud karon wala pa’y napanday nga balaod nga nagdili sa political dynasty bisan kon gimando na kini sa Konstitusyon.  Kay matud pa bitaw, “Sa politika, “nasty” (makadaot) ang dynasty.  Apan alang sa mga kongresista, “tasty” (lamian) ang dynasty.”  Fezteleern!  

Adlaw tanan magmika (ATM)

Uyon si Cebu City Mayor Raymond Alvin Garcia nga rebisahon ang giproponer nga first supplemental budget (SB1) agi’g pagsanong sa rekomendasyon sa konseho.  Mahinumduman nga nalangkob sa maong SB1 ang budget alang sa Charter Day bonus sa mga empleyado. Malangan diay ang pagdawat sa mga empleyado sa ilang gikahinaman nga bonus.  Tuaw pa sa ubang empleyado, “Kay dili pa man mahibalik ang gi-prenda nga ATM bugti sa maong bonus, “Adlaw’ng Tanan Magmika (ATM)” pa usab ang mga empleyado hangtud nga marelease na ang bonus.”  Ateerr!

SRP sa karne

Gipahibalo sa Department of Agriculture nga aduna nay ipatuman nga suggested retail price (SRP) sa karne’ng baboy.  Nakab-ot ang maong hukom human sa sunod-sunod panagtigom sa mga stakeholders ug sa DA officials.  Sama sa naandan, i-base lang ang SRP sa kon pilay angayan maginansya sa mga negosyante.  Apan matud pa sa akong amigo, “Dili na kinahanglan magpatuman og SRP.  Sa kalisod sa kahimtang karon, ang mga pobre dili na mopalit og karne kay dili maka-afford ug ang mga datu dili usab igsapayan bisan mahal ang karne.”  Pagkatoytoy!