Comeback series gitingoha

CEBU, Philippines — Bukas si Dingdong Dantes sa sugyot sa fans nila ni Marian Rivera nga mag-uban sila og balik sa usa ka teleserye.  Una na nga nigawas ang taho nga dunay pagabuhaton nga serye si Dingdong karong tuiga sa GMA-7 ug wala pa matino kun kinsa ang mga kauban niya sa maong proyekto.

Trabaho to the max

Todo dawat si  Jean Garcia og  back-to-back projects  isip pagpaneguro nga duna siya'y igong tinigom sa higayon nga moretiro na siya sa showbiz .Nagsagunson ang Kapuso projects sa aktres nga sama sa  First Yaya (2021), First Lady (2022), Lolong (2022), Nakarehas Na Puso (2023), Maging Sino Ka Man (2023), ug Widows' War (2024). Kasamtangan usab siya nga makita sa  Lolong: Bayani Ng Bayan .

Nauyonan gyud

Padayon nga gikagat sa publiko   ang tandem nila ni Kim Chiu ug Paulo Avelino. Kasamtangang gi-promote sa duha ang ilang pelikula nga My Love Will Make You Disappear . Giangkon ni Paulo nga wala gyud niya damha ang nagpusotpusot  nila nga mga proyekto ni Kim.“ Kasi parang after a while, naiba na rin ‘yung tahak ng mga gusto kong gawin. So, hindi ko alam na kay Kim pala ang bagsak ko,” ni Paulo pa.

Power judges sa PGT Season 7 gipaila na

Gianunsyo na sa ABS-CBN ang pangalan sa power judges sa "Pilipinas Got Talent" season 7 nga magsugod karong Marso.

Ang  bag-ong set sa mga hurado kay naglangkob nila ni  Freddie "FMG" Garcia, Donny Pangilinan, Eugene Domingo, ug Kathryn Bernardo.

Sa tan-aw ni Eugene, perpekto ang ilang grupo nga magtinabangay ug mag-promote sa talentong Pinoy.

"FMG is the authority.  I add the fun.  Kathryn is the heart.  And Donny represents the young generation,"  ni Eugene pa

Samtang bag-ong hagit ni Kathryn ang pagkapili niya isip hurado  sa "PGT".

"This is another first for me, and I want to experience it.  I think it's a good breaker after doing 'Hello Love Again' and before I start with a new project," nagkanayon si Kathryn .

Dream come true  usab alang kang Donny nga mahimong kabahin sa "PGT."

"Pangarap namin ni Robi to do 'PGT' together. Dati pa as in MYX days. I'm so glad that they have put so much trust in me, and right now, I'm just gonna try to learn as much as I can," saysay ni Donny.

Si  FMG sa  iyang bahin,  malipayon siya sa pagbalik sa "PGT" nga adunay mga bag-o ug eksplosibong aksyon .

"It feels so good because it's been so long. I'm so excited kasi baka ngayon ko makita yung talent na hinahanap ko," pagpaambit pa niya.

Arixe sa spotlight

Nahimong brand ambassador sa nagkadaiyang  kompanya  ug kanunay nga kalmado sa pagrampa sa entablado.

 Siya si   Arixe Soliva,  28 anyos ug tang-an na kun maghisgot og mga fashion show . Dili na basta -basta ang naabtan ni Arixe sanglit ubay-ubay na ka mga kompanya ang iyang gialagaran kun diin nagsilbi siya nga modelo.

Base sa iyang  profile nga gipaambit dinhi sa Banat News Hugyaw , ang Stacy's Modeling Management maoy kasamtangang nag-atiman sa iyang career. Kanhi flight attendant  si Arixe .

Dili masukod ang gibati niya nga  kalipay gumikan sa paglawig og maayo sa iyang modeling career. Sukad pa sa iyang pagkabata , pangandoy na gyud niya nga mahimong model , ug wala niya damha niya nga maabot siya sa international level.

 Kahinumdoman   nga nakadawat siya og international model award sa Asian International Fashion Runaway nga gipahigayon sa Kuala Lumpur didto sa Malaysia  kun diin gi-representar niya ang Pilipinas  ug nakadungan niya sa maong kalihokan mao ang mga  modelo nga gikan sa   China,  Singapore, Japan, Indonesia, South Korea, Vietnam, Malaysia, ug uban pa .

Nakahuman  si Arixe sa  kursong Bachelor of Arts in Tourism and Hospitality Management  didto sa  Visayas State University  (Leyte ).

Siya usab ang representante karon sa Barili alang sa umaabot nga Mister Island Tourism Philippines 2025. 

"Kahiamgo"

Usa na usab ka short film ang suwaton ug direhian ni Sam Costanilla, presidente sa Visayan Filmmakers Network.

Kini nag-ulohan og "KAHIAMGO" nga apilan nila ni Mazy Streegan, Winky Streegan, Jojo Flores II, Cathal Stacy Magallen Campilan, Zachary Aiden, Carlos Miguel Gonato, Harvey Lubas, Bella Oppus Obenza, Rey Loquere, Alain Montesclaros ug Jojo Labella. Ang world premiere niini kay mahitabo karong Marso 25, 2025, alas 8:00 sa gabii, pinaagi sa 818 LILAS Production FB page ug YouTube channel.