Jake ug Inah mogama og mga pelikula

CEBU, Philippines — Gipahibalo sa mag-uyab nga sila si Jake Vargas ug Inah De Belen nga gisudlan na nila ang kalibutan sa pagmugna og pelikula. Sa usa  ka episode sa programang Family Feud,  gibutyag sa duha nga sugdan na nila karong tuiga ang una nila nga movie project.

Suma pa sa mag-uyab nga duna na sila’y listahan sa mga artista nga mahimong kabahin sa maong pelikula ug ila ra kining panganlan kun plastada na ang tanan.

Target nila nga ipasalmot kini sa nagkadaiya nga film festivals sa laing mga nasud.

Kapin na sa walo ka tuig ang relasyon nila ni Jake ug Inah.

Nagdugay sa ere

Dunay espesyal nga selebrasyon karong tuiga  ang mga programa ni  Michael V  sa GMA-7. Nasayran nga saulogon karong tuiga ang  30th anniversary sa Bubble Gang ug  15th anniversary  sa Pepito Manaloto. Nagtimaan kini sa lig-ong abilidad ni Michael V sa natad sa komedya.

Gihatagan og gitara

Puwerting lipaya ni Julie Anne San Jose sa dihang giablihan niya ang  Valentine’s gift nga gikan sa iyang uyab nga si  Rayver Cruz. Usa kini ka klase nga  gitara nga dugay na niya nga gipangandoy. "Thank you love. My first ever bass. Hala, ang ganda,”  ni Julie Anne pa.

Bag-ong national director

Si Miss Universe 2013 3rd runner up Ariella Arida maoy bag-ong national director sa Miss Universe Philippines. Gianunsyo kini atol sa Press Presentation niadtong Sabado. Moabot ngadto sa 69 ka mga kanidata ang magtigi sa maong indigay karong tuiga.

Vice , Belle, Seth ug uban pa   nag-uban sa usa ka album

Gilangkoban og 15 ka mga awit gikan sa pipila ka Kapamilya artists ang album nga  "StarPop: The Remixes Volume 3".

Ang bag-ong koleksyon naglakip sa remix sa mga kanta ni Belle nga "Apelyido," "Biglaan," ug "Walang Pake" ingon man ang iyang "Believing in Magic" collab uban nila ni Alexa Ilacad ug Francine Diaz.  Pasok usab ang "Bwak, Bwak, Bwak!" ni Vice Ganda, ang Clean Version ug Explicit Version nga nalakip usab sa album.  

Duna pu'y bag-ong  tingog sa "Kung Naging Tayo" ni Alexa ug ang "Walang Hanggang" duet nila ni KD Estrada.  Ang bag-ong remix album gi-arrange ni Theo Martel ug giprodyus ni StarPop label head Roque “Rox” Santos.

Nalakip  usab niini ang reimagined versions sa "Ikaw at Ikaw" sa P-pop group 1621BC, "Di Ka Nag Behave" ug "Iba Ka" ni Seth Fedelin," "You Didn't" ug "Masterpiece" ni Anji Salvacion," "Karapatdapat" ni Kakai Bautista, ug "Oh Divine Diva" sa grupong Divine Divas.  

Ang "StarPop: The Remixes Volume 3" madungog na sa nagkalain-laing music streaming platforms.