Ni sugod na og bukal

Gibiyaan na ba si Cebu City Mayor Michael Rama sa iyang mga alalay sa konseho?

Kun atong basihan ang nahitabo sa P100 billion nga annual budget proposal ni Rama alang sa tuig 2024, dayag ug tataw ang tubag sa maong pangutana.

Una gilaslasan sa konseho nga gipangulohan ni Bise Mayor Raymond Garcia ang budget proposal ni Rama og sobra sa 70 porsiyento. Inay P100 billion, kapin lang sa P25 bilyones ang gitugot sa konseho.

Dihang gi-veto ni Rama ang mga probiso sa budget ordinance nga wala niya maayoni aron unta ibalik ang orihinal niya nga proposal, gitamparos siya sa mga sakop se konseho nga kasagaran iyang mga kaalyado sa politika og makabugong nga mayoriya aron i-override ang iyang veto. Sigun sa record sa konseho, way usa sa mga sakop sa City Council ang misupak nga i-override ang veto sa mayor. Bisan ang iyang mga sinaligan wala modupa sa iyang budget.

Timailhan ba ni sa nagkahilis nga impluwensiya ni Rama sa mga konsehal? Unsa may nag-aghat sa mga konsehal niining dayag nila nga pagsupak sa kabubut-on sa mayor? Nakakita  na ba sila og mas gamhanan nga alyado nga mosapupo nila sa sunod nga eleksiyon? Kinsa ang maong padrino nga may katakos pagpakigsakbang  sa makinarya sa naglingkod nga mayor?

Sinugdanan naba kini sa panagbuwag sa hingpit nilang Rama ug sa iyang bise mayor? Kun mahitabo nga magkabuwag ang alyansa nilang Rama ug Garcia, mahitabo kaha ang ilang panagsangka sa politika sa sunod nga eleksiyon?

Andam na ba si Garcia nga makigsakbang sa beterano nga si Rama o magpasubli lang siya isip bise mayor ubos sa landong sa laing lider? Posible kaha nga ang lider sa Partido Panaghiusa nga si MCWD Chairman Joey Daluz III ang mopapili sakbang ni Rama?

Gawas ni Garcia ug ni Daluz, laing pangalan nga mitumaw karong bag-o mao ang kanhi commissioner sa Bureau of Customs nga si Felimon Yogi Ruiz, kinsa gipaluyohan sa mga kaalyado sa Bando Osme a Pundok Kauswagan kun BOPK.

Layo pa hinuon ang 2025 nga piniliay ug daghan pa ang posibleng mahitabo. Apan tataw nga nagsugod na og bukal ang kawa sa politika dinhi sa dakbayan.