12 Finalists napili na

CEBU, Philippines — Napili na ang 12 ka finalists nga magsangka sa ika-15 nga edisyon sa Sinulog Idol nga mahitabo karong Enero 2024 sa Fuente Osmeña Circle sa Dakbayan sa Sugbo.

Ang 12 kabfinalists kay nipaubos og duha ka adlaw nga audition gikan niadtong Oktubre 27 ug 28, 2023 sa Sinulog Idol Foundation Office.

Ang  finalists sa  Sinulog Idol Season 15 kay nalangkob nila ni Gerlyn Abaño (Inayawan, Cebu City), Bon Miguel Baquiran (Argao, Cebu), Mary Khem Cabagte ( Medellin, Cebu), Niño Canasa (Carcar City), Patricia Sofia Capon (Danao City), Klarylle Dumancas (Talisay City), Christian James Igot (Mandaue  City), Veronica Jañola ( Pardo, Cebu City), Angeline Maurin (Aloguinsan Cebu), Jon Lori Pantilgan (Carcar City), John Ryan Panuncialman ( Carcar City) ug Rodel Pogoy (Cordova, Cebu). Sama sa naandan, pito ka gabii magsangka ang  finalists pinaagi sa pagkanta og nagkadaiyang genre kun diin mao kini ang basehan sa kompetisyon  kun kinsa ang angayan nga makaangkon sa gikahinaman nga titulo nga mao ang Sinulog Idol Season 15 Grand Champion.

Ang kasamtangang naghupot sa titulong Sinulog Idol mao si Johnel Bucog nga naggikan sa Dakbayan sa Talisay.

Ang maong kalihokan kabahin kini sa mga naglinya nga kalingawan samtang nagsingabot  ang kapistahan sa Balaang Bata nga si Senyor Santo Niño.