EDITORYAL - Pag-abusar pagdala sa armas

Hangtud karon naa pa gihapoy pipila ka mga binuhatan sa kapolisan nga dili na madawat sa publiko karong panahona.

Kini ang dayag nga pagpakita og paglaban sa ilang mga kaubanan o mga kanhi kauban nga nag-atubang og kontrobersiya batok sa mga sibilyan.

Kini maoy nahitabo kang Quezon City Police District (QCPD) director Brig. Gen. Nicolas Torre III kinsa gigisa sa publiko human sa pagpatawag niya og press conference bahin sa nahitabo.

Apan dili madawat sa katawhan ang resulta sa maong press conference tungod kay daw gidapigan niya ang na-dismiss nga kanhi polis nga si Wilfredo Gonzales.

Si Gonzales mao katong tawo nga nag-viral sa social media nga nanapog ug nanion og armas sa usa ka siklista tungod sa lalis sa trapiko niadtong Agosto 8 ning tuiga.

Ang siklista gidapog, apan sa dihang giatubang niini ang nanapog, nibunot dayon kini og armas gikan sa hawak ug nikasa kini. Natural walay nabuhat ang siklista batok aning armadong tawo.

Maayo nalang nga dunay concerned citizen nga nakakuha og video nga gi post sa social media, kay kun wala pa, dili mahibaw-an sa katawhan Pilipino ang maong hitabo. Atol sa press conference niadtong Agosto 27, si Gonzales namahayag nga nagkaestorya na sila sa maong siklista ug nagkasinabtanay na sila og ilaha nalang kadtong kalimtan.

Gikataho nga nahadlok mopasaka og kaso ang siklista kay nakadawat siya og mga hulga sa kinabuhi gikan sa mga opisyal sa kapolisan. Gipugos sab siya pagpapirma og pamahayag nga siya maoy sad-an sa maong insidente.

Si Torre miduso og resignation letter ug nangayo sab kini og pasaylo sa katawhan.

Makahadlok kaayo kining sama niini nga mga hitabo nga abusaran sa mga gitugotang magdala og armas sa gawas sa ilang panimalay.

Samut nga makahadlok kun kining mga abusado ug sad-an pa maoy dapigan tungod kay duna silay mga kaila o koneksyon ug balihon pa aron ipagawas nga ang biktima maoy sad-an.

Ingon niana ka grabe ang pagabuso nga kayang buhaton sa mga impluwensiyadong tawo dinhi sa Pilipinas.

Karon nga dunay Comelec gun ban,  tingali maayong patas ang pag-inspeksyon sa kapolisan sa mga motorista, apilon unta sa pagtan-aw ang mga de sakyanan.