Kusog magpautang

Dear Tito Miguel ,

Ako diay si Gab , taga Minglanilla, Cebu . Naproblema ko sa akong uyab nga si Mariah, kay hilig kaayo magpautang, ug dako kaayo ang ipatong nga interest. Ako siya giingnan nga makagaba na busa kinahanglan nga moundang na siya niini. Pero dili man gyud siya mopatoo uy.  Motuo ra ba gyud ko og gaba. Unsa akong buhaton Tito Miguel para mopatoo siya nako? — Gab

* * *

Gab,

Ipaamgo nga dili makatawo iyang negosyo nga pautang, iyang gipahimuslan ang kawad-on sa uban. Lagmit mangatarungan nga sila man ang niduol kaniya. Mao gani nga niduol kay wala nay laing kadangpan. Ang kadako sa interes ila na lang piyongan. Dili kini makiangayon, supak sab kini sa gitudlo sa simbahan. Depende sab unsa iyang tinuohan. Apan ang sayop ug insakto wala sa relihiyon, duna kita’y gitawag nga natural law diin ang pamintaha ug pahimulos ginadili maski wala’y lagda. Nakapatik kini sa konsensiya.  Kun dili gihapon mopatuo labi na’g mao ra iyang gisaligan, hulgaa nga mahimo siya gukdon sa otoridad kun wala siya magparehistro ug magbayad sa buhis. Kun dili mahadlok, pasagdi. Pero ingna nga inig kabulilyaso, dili nimo siya tabangan, kay sa pahimangno wala ka nagkulang.

Apan siguroha sab nga wala ka makatagamtam sa iyang income gikan sa pautang. Kay basin sige ka’g badlong apan ikaw mismo nakinabang, basin sa inyong mga date siya mogasto, o dili ba kaha modawat ka’g regalo. Tabla ra nga imong gikunsinti iyang negosyo nga supak nimo. Lagmit mopatuo, mobilib nimo kay gibarugan gyud nimo imong prinsipyo.

Kun dili gihapon matandog, angay na ka magduha-duha. Imo ba gihapon siya pakaslan pero dili ka makaako magtan-aw sa iyang pagpahimulos sa uban? Posible sab hagiton ka nga moundang siya pero kinahanglan dili mo maglisod. Kaya ba nimo saw-on ang tanan? Kay kun dako ka’g income, dili na siya kinahanglan magpautang. Pero naa ra nimo’g asa ka mahimutang nga dili mahugno imong baruganan. Tito Miguel

Magpatambag ka? Ipada kang Tito Miguel: 0991-318-9366