Beauty ipares kang Bong

CEBU, Philippines — Si Beauty Gonzales ang gidungog nga mamahimong leading lady ni Senator Bong Revilla sa remake sa classic movie nga “Walang Matulis Na Pulis Sa Matinik Na Misis” nga sa GMA ipalugwa. Kasamtangan nga gihimo karon ni Beauty ang teleserye nga “Stolen Life” kauban sila si Carla Abellana ug Gabby Concepcion, ug mulugwa sa GMA7 sa Hulyo.

Ayaw na’g comment!

Gibuyag ni Kris Aquino si Batangas vice governor Marc Leviste sa dili na pagkomento sa iyang mga post. Kini human nagbilin og emoji si Leviste sa latest IG post ni Kris kabahin sa iyang health update. Katarungan ni Kris, maikod siya sa mga konstituente ni Leviste nga magtuo nga nagpunay na lang og atiman kaniya ang maong opisyal kaniya inay igahin ang panahon ngadto sa pagserbisyo sa iyang mga ginsakpan. Matud ni Kris, mas namatud-an na matud pa ni Leviste unsa siya ka maayong higala karon nga adunay hagit ang iyang kahimsog, ilabi na nga nilupad gyud kini paingon sa Amerika niadtong Pebrero.

Julia-Alden movie

Magpares sa usa ka pelikula sila si Alden Richards ug Julia Montes. Kana maoy nikatap nga tsika niadtong Domingo, diin matud pa, GMA Pictures kauban ang Cornerstone Entertainment maoy mogama niini. Karong adlawa, April 18, gipaabot nga pormal nga ipahibawo nila ni Julia ug Alden ang kabahin sa maong pelikula, lakip na ang dagan sa istorya niini ug ang director.

Salamat kaayo

 Napuno sa pasalamat ang kasingkasing ni Kim Chiu human sa iyang birthday production number sa ASAP Natin ‘To niadtong Domingo. Suma pa sa “Chinita Princess ng Cebu”, mapasalamaton kaayo siya ngadto sa ABS-CBN nga gihatagan gyud siya’g kahigayonan nga mapakita ang iyang abilidad sa pag-arte, pagsayaw ug pagkanta. Gihatagan matud pa siya og kahigayonan nga himuon ang unsay mahimo niyang mabuhat sa natad sa entertainment. Ugma, April 19, maoy 32nd birthday ni Kim.

Claudine, mama ni Belle

Nibuto ang tsika nga mobalik na pagmugna si Claudine Barretto og teleserye sa ABS-CBN. Kini pinaagi sa “Can’t Buy Me Love” nga proyekto sa loveteam nila ni Donny Pangilinan ug Belle Mariano. Siya matud pa maoy modala isip mama ni Belle. Samtang nagkagubot ang netizens human gi-upload ni Claudine ang latest picture sa iyang anak nga si Santino. Kini kay matud pa sa netizens, gwapo kaayo si Santino nga karon bayong-bayong na.

Maura'g dili 47!

"Vavavoom"! "Hot ni idol"! "Slay"! "Wow"! Ang pipila sa reaksyon sa followers ni Ina Raymundo niining iyang mga hulagway nga gi-upload niya sa Instagram tulo ka adlaw na ang nilabay.

Hingpit na gyud

Nagbulag na gyud sa hingpit sila si Maui Taylor ug ang amahan sa duha niya ka mga anak nga lalaki. Ang tsika, sa wala pa nag-Biyernes Santo, nagbuwag na sa hingpit ang duruha. Kahinumduman nga nabalita sa PEP Cabinet Files niadtong January nga dekada na silang nagtipon. Sa unang pito ka mga tuig, maayo ang dagan sa ilang relasyon, apan sa nilabay nga tulo ka tuig, nawala na ang pagbati nila sa usag-usa, apan sa samang balay gihapon sila nagpuyo alang sa ilang co-parenting arrangement. Walay kalibutan ang ilang mga anak sa ilang sitwasyon kay kun magkuyog sila sa balay sama sa pagpangaon, normal ra sila og mga lihok. Pero wala na sila nagdulog ug gipatuo nila ang ilang mga anak nga gumikan kini sa iyang vertigo. Sa laing lawak siya natulog.

Daghang nagpacute

Gibutyag ni Jillian Ward ngadto sa PEP nga human siya nag-18, nisamot kadaghan ang buot mangulitawo niya pero iyang gibalibaran. “Alam niyo po, nung nag-eighteen po ako marami na pong tumatapang at tsaka nagpapa-cute, e kaso po hindi po sila nanliligaw kasi hindi po ako nagpapaligaw pa." Trabaho usa gyud ang iyang priority. Naanad na sab matud pa siya nga dili mogawas sa balay kun walay trabaho, bisan pa og medyo mutugot na ang iyang mga ginikanan nga mosuroy siya nga siya lang. Siya na matud pa maoy mobalibad kay naanad siya kuyog iyang ginikanan, usahay iyaan.

Dili siya polis uy!

Gibasura ni Melai Cantiveros ang mga tsismis nga nagbulag na sila sa iyang bana nga si Jason Francisco. Nagsugod ang maong tsismis human nga taod-taod na nga wala igkita sa Jason sa mga social media posts ni Melai, diin kaunay nga silang tulo lamang sa iyang mga anak ang magkauban. Kagahapon, gipakita ni Melai ang hulagway ni Jason nga maoy nagdrive ug nihatud niya sa ABS-CBN alang sa iyang morning show, Magandang Buhay. Ni Melai pa, “Good morning mga kapisanan ng mga marites sa Pilipinas.” Dugang niya nagkomedya, “Asawa po ako hindi po ako pulis, hanapan ng nawawalang tao. Hayan napo hinahanap niyo…buhay na buhay walang kahit na anong sugat. Pinagdrive napo tayo mga ka Mari[tes].”