Online Casino addict!

Dear Tito Miguel,

Maayong adlaw idol! Sige gyud ko basa sa imo column kay ganahan kay ko nimo manambag. Ako diay si  Cha-Cha, taga Consolacion,Cebu . Ang problema nako ba kay naadik naman ko sa online casino. Kadaghan nako nga nag-attempt nga moundang pero mangatol gihapon akong kamot.  Unsa ang angayan nakong buhaton para ma-motivate ko nga moundang na gyud sa akong bisyo? — Cha-Cha

Cha-cha,

Kun sugapa na ka sa sugal, lagmit kinahanglan na nimo ang propesyonal nga tabang. Kay ang addiction lisod biyaan, sama ra na sa droga ug sigarilyo. Sa mga tawo nga wala ma-addict, sayon ra pagsulti nga biya, apan sa nahisugamak na, lisod maski sila mismo kahibawo sayop. Sama nimo, mangatol ang kamot. Busa kun dili na kapugngan, konsulta’g propesyonal, basin kinahanglan na ka’g therapy. Samtang wala pa nimo ni buhata nga lakang, mahimo nimo suwayan ang mosunod. Wala ka maghisgot kun minyo ka, naay uyab o single. Kun minyo na, ihatag ang tanan nimong kuwarta sa imong bana o sa inyong anak nga kasaligan. Ipakandado sa banko kun kinahanglan. Kun wala kay puhonan, wala kay ikasugal.

Kun nagtrabaho ka’g naay suweldo, ihatag imong ATM sa imong bana o anak aron sila nay budget sa tanan. Kun naa kay uyab o single, ihatag ug ipakandado ang tanan sa imong ginikanan o igsuon nga kasaligan. Apan ang kapait kay ang sugarol mangutang aron lang dunay ika-puhonan. Sama ra sa adik sa droga, mangawat pa. Samtang dili pa mangatol imong kamot, ingna tanan nimo puwede utangan nga di ka pautangon kun molikoy na sad imong utok. Ingna daan ang magpautang nimo dili nimo bayran. Kinahanglan sad ka’g diversion, pakigkita sa imong pamilya o mga higala nga tarong, paglingaw nga ang gastohanan kaon ra’g experience. Mawala tuod imong kuwarta apan kalipay imong ginansiya, dili kapildihan. Sa sugal wala’y ni-asenso, de buenas karon demalas sunod. Tabla ra, imong kuwarta nahanaw pa. Tito Miguel

Magpatambag ka? Ipada kang Tito Miguel: 0998-581-5856