Pambato sa Hipodromo ang hawod!

CEBU, Philippines — Ang pambato sa Barangay Hipodromo sa Dakbayan sa Sugbo nga si Maxell “Max” Muldez ang gideklara nga "Star of the Night" atol sa Rock Night sa Sinulog Idol Season 14 nga gipahigayon sa Fuente Osmeña Circle niadtong Lunes sa gabii.

Nakadayeg ang mga hukom sa iyang sensual nga performance sa "Pour Some Sugar on Me" nga gipasikat ni Def Leppard. Sa mubo ug direkta nga komento gikan sa usa sa mga hukom nga si Banat News entertainment editor Ryan Mark maisip nga dumadaog na si Muldez niadtong tungora. Komento ni Ryan Mark,“perfect song, the movement, the body language, everything… beautiful”.

Kauban ni Muldez sa Top Three sila si Johnel “Nel” Bucog ug Doreen “Dee” Geralla human sa ilang impresibong performance sa "Come Together" sa The Beatles ug "Decode" sa Paramore.

Sa laing bahin, nagpabilin nga nagtanggong sa Bottom Three si Jaienne Braveree “Brave” Suralta kinsa upat ka gabii na nga sagunson na nga nakalingkawas sa tinaktakay sa kompetisyon human nga ang iyang kauban sa maong sitwasyon niadtong gabhiona nga sila si Dominic “Doms” Quibido ug Hidle Lyn “Hides” Resurreccion ang nanamilit sa kompetisyon.

Sa katapusang gabii ni Hides ug Doms sa kompetisyon, ang duha mapasalamaton sa mga nangulo sa Sinulog Idol ug ilabi na sa mga hurado nga mihatag og kahigayunan nga mahimong kabahin sa kompetisyon. Ang duha nagbalik-balik na og salmot sa maong kompetisyon niadtong mga milabay nga mga katuigan apang bisan og sa audition pa lang, mapakyas gyud sila nga mahimong kabahin sa Top 12. Karong tuiga, naangkon na gyud nila ang ilang gikahinamang higayon.

Sa ilang pagpanamilit sa kompetisyon, ang duha nakat-on nga dawaton ang ilang kapalaran sa kompetisyon ug gani, dako ang ilang pasalamat nga mabungahon ang ilang byahe sa kompetisyon gumikan kay nakaangkon sila og mga pagtulun-an gikan sa mga nagkadaiyang mga mentors nga matud pa sa duha, bawnon gyud kini nila bisan pa man og asa paingon ang ilang karera puhon.

Naay Forever

Mubo pero kilig ang mensahe ni Anne Curtis alang sa birthday sa iyang bana nga si Erwan Heussaff. "To the rock of our lil’ fam, happy birthday Erwan  you rock our world and rule our hearts. Love you forever." Kasamtangan silang nagbakasyon sa Australia kauban ang ilang anak nga si Dahlia.

Online show

Ang "Just In" online show sa Sparkle Artist Management youtube channel ang rason nganong nagkuyog sila si Alden Richards ug Paolo Contis. Si Paolo ang host niini ug si Aldeb ang guest sa first episode sa season four.

Follow-up dayon

Thriller movie ang follow-up project ni Nadine Lustre sa Viva Films human sa kalampusan sa Deleter sa nilabay nga Metro Manila Film Festival. Nasayran nga nikita og P233.68 ang Deleter gikan sa December 25, 2022 hangtud sa January 8, 2023 ug mao kini ang highest-grossing movie sa film festival. Gipaabot nga mosaka pa ang kita sa maong psychological suspense sanglit isalida gihapon kini sa 100 ka mga sinehan lukop nasud.

Thursday Group

Nagtapok ang magbarkada nga sila si Dimples Romana, Bea Saw ug Bea Alonzo niining bag-o lang. Kini aron magbonding isip pagsaulog sa pagmabdos ni Saw. Post ni Dimples: May bagong mini member ang Thursday Barkadaaaa." Ang tulo nagkasuod human sila nagkatrabaho kaniadto sa Star Cinema blockbuster movie One More Chance nga gibutuonan ni John Lloyd Cruz ug Alonzo.

"Condo viewing" kuno

Gi-surprise si Glaiza de Castro sa iyang mga higala og usa ka bridal shower. Wa gyud siyay ideya sa nahitabo. Gidad-an pa siya ni Angelica Panganiban og red dress aron maoy iyang isul-ob sa event. Ang iyang mga higala pud ang nikuha og sponsors alang sa maong bridal shower. Gawas kang Angelica, nitambong sab si Maxene Magalona. Niapil sab sila si Isabel Oli, Sheena Halili ug Kakai Bautista. Suma ni Glaiza, gidapit matud pa siya og condo site viewing, ug pag-abot niya, na surprise na lang siya. Gikasal na si Glaiza didto sa Ireland ngadto sa iyang bana nga si David Rainey. Magpakasal silag usab dinhi aron makatambong pud ang pamilya ug friends ni Glaiza.

Pit Senyor!

Moshagit og kusog ang cast sa trending teleserye sa GMA7 nga Mara Clara at Ibarra alang sa usa ka Kapuso Fiesta. Sila si Julie Ann San Jose, David Licauco, Juancho Triviño, ug Andrea Torres ang makig pit senyor sa ilang fans diha sa Ayala Center Cebu sa Biyernes, January 13, 2023, 5pm.

Pagka ugma, ang cast na sab sa ABS-CBN teleserye Iron Heart ang moshagit og kusog anha gihapon sa Ayala Center Cebu. Ang Kapamilya Caravan langkuban nila ni Richard Gutierrez, Sue Ramirez, Pepe Herrera, Sofia Andres ug Jake Cuenca. January 14, 2023, 5pm, kini mahitabo.