Sila na pud
CEBU, Philippines — Apil na sa labing prestihiyoso nga indigay sa pagkanta dinhi sa Sugbo nga mao ang Sinulog Idol!
Sa ika-14 nga edition, bukas ang maong kompetisyon alang sa 15 hangtud 25 anyos ug gikinahanglan nga nagpuyo sa Sugbo. Aron makaapil, magdala og half-body photo ug andamon usab ang mga dekalibre nga mga audition pieces.
Ang audition mahitabo karong Oktubre 22, 2022 sa ala una sa hapon sa Sinulog Foundation Office nga anaa sa Cebu City Sports Complex.
Kun ikaw palaron ug makasulod sa unang hugna sa audition, mahitabo ang callback karong Oktubre 23, 2022 sa samang takna ug lugar. Ang Sinulog kapin sa usa ka dekada na kini nga nagpasundayag sa Dakbayan sa Sugbo.
Lahi sab kini nga matang sa kompetisyon gumikan kay usa ka semana nga magtigi ang mamahimong finalist ug gani, sa ikapito nga gabii, ug lain-lain og genre matag gabii.
Ang maong kompetisyon usab mao ang nahimong tulay alang sa mga aspiring singers aron mahimong ilado ang ilang pangalan ug lakip na usab nga mao kini sinugdanan aron nga mahibaw-an sa kinabag-an ang talento nga angay nga ipadungog ug ikapanghambog.
Gani, ang mga nabantog nga singers dinhi sa Sugbo mga produkto kini sa Sinulog Idol sama ni Jacky Chang, Raechelle Faelnar, Ronna Jenn Lofranco Cañete, Jared Roble, Chingkie Maylon, Jessa Mae Abaquita, Aian Uba, Arnold Pepino, Melody Hodgson, ug ang Maka-Girls nga gilangkuban nila ni KC Dilao, Gen Flores ug Angel Maranan.
Ang maong kompetisyon pagahukman gihapon sa mga banggiitan nga mga personalidad sa Sugbo nga sila si Ultimate Vocal Coach Jay Unchuan, PDA Scholar Apple Abarquez ug Media Practitioner Ryan Mark.
- Latest
