Malampusong Silmugi Festival 2016!

CEBU, Philippines - Sud na sa pito ka tuig nga gipasiugdahan sa kagamhanan sa lungsod sa Borbon ang Silmugi Festival. Usa kini sa mga dagkung kalihukan nga atngan sa mga Borboranon atol sa kapistahan sa ilang patron nga si Sr. San Sebastian, usa ka martir, matag Enero 20. Karong tuiga mao na ang ika-154 nga kapistahan sa dapit.

Dunay mga higayon nga madungan ang maong kalihukan sa Sinulog Grand Parade sa dakbayan sa Sugbo, mao nga usahay maglibog ang mga Borboranon kun asa motambong.

Sa wala masayod, Silmugi ang karaang ngan sa Borbon subay sa labing daku nilang sapa nga mao ang Silmugi River. Dinhi giingong nagsugod ang sibilisasyon sa kasamtangang 5th class municipality sa amihanang bahin sa lalawigan sa Sugbo. Giingong Silmugi ang ngan sa lider sa dapit sa wa pa maabot ang mga Katsila.

Nahimo nang usa sa mga tourist attractions sa maong lungsod ang Silmugi River sukad nga ila kining gihimo nga eco-tourism site.

Dihang nakabaton og pari ang maong lungsod niadtong panahon sa mga  Katsila, giilisan niini ang ngan sa lugar og Borbon, ang dapit kun diin siya nagagikan.

Ang Silmugi Festival 2016 gisalmutan sa pito ka mga contingents gikan sa mga dagkung tunghaan sa lugar:

1. Tabunan National High School

2. Tribu Managasehanon sa Mar and Dorie Darunday National High School ug Brgy. Managase

3. Tribu Masidlakon sa Don Emilio Osmeña Memorial School ug Brgy. Sagay

4. Bongdo National High School

5. Borbon National High School ug Brgy. Poblacion

6. Tribu Campusongan sa Campusong National High School

7. Tribu Masaulogon sa Doña Milagros Osmeña National High School ug Brgy. Lugo

Nanukad ang street dancing sa Borbon Central Elementary School paingon na sa hawanan sa kilid sa ilang simbahan.

Apan sa wa pa manayaw alang sa ritual showdown ang mga contingents, nagtigi una ang tulo ka grupo sa mga tinun-an sa elementarya alang sa Drum, Lyre and Bugle Corps, diin ang milangkat sa kampiyonato mao ang Borbon Central Elementary School DLBC Team.

Nagkadaiyang konsepto sab ang gipakita sa pito ka contingents atol sa showdown na alang sa Silmugi Festival.

Gipadaug sa mga hurado ang Borbon National High School base sa ilang tin-aw nga storyline, nindot nga sayaw ingon man choreography. Gisundan kini sa Tribu Managasehanon sa Mar and Dorie Darunday National High School ug Brgy. Managase samtang nakuha ang ikatulong ganti sa Tabunan National High School.