DJ RAM mipanaw sa edad nga 38

CEBU, Philippines - Mipanaw niadtong Huwebes sa gabii, September 10 ang giila nga aktibong promoter sa Bisrock nga si DJ Ram o Ramil Dizon sa tinuod nga kinabuhi.

Ang igsuon ni DJ Ram nga si Cebu City Councilor Alvin Dizon misaysay dinhi sa Banat News Hugyaw (BNH) nga duha ka tuig na nga gihambin sa iyang igsuon ang sakit sa kidney.

Taud-taud na nga gipaubos sa dialysis si DJ Ram ug nakabsan kini sa iyang kinabuhi sa usa ka hospital didto sa Ormoc City nga maoy iyang yutang natawhan.

Nasayran nga ni-collapse matud pa si DJ Ram sa ilang panimalay sa miaging adlaw busa dali kini nga gidala sa tambalanan.

Ang iyang patay nga lawas gihaya sa St Peter Funeral Homes - Ormoc City ug sabotan pa sa pamilya ni Ramil ang schedule sa iyang lubong, (September 15 ang tentative schedule).

“Buotan kaayo nga igsuon si DJ Ram, pinangga gyud kaayo niya ang among pamilya,” suma pa ni Konsehal Dizon.

Matud pa niya nga  dako gyud og kontribusyon ang 38 anyos nga si DJ Ram sa pag-ugmad sa mga Sugbuanon nga awit.

“Dili gyud siya malimtan sa mga tawo gumikan sa pagtabang niya og promote sa Bisrock,” dugang pa niya.

Gradwado  si DJ Ram sa kursong  Business Administration  ug natawo siya niadtong  April 2, 1977 didto sa  Puntaville, Ormoc City.

Mikisaw ang pangalan ni DJ Ram human gipalawig niya sa publiko ang Bisrock pinaagi sa mga programa niya kaniadto sa 93.1 Smash FM nga sister station sa dyLA..

Gipistahan kaniadto sa bisrockers ang radio program niya nga “Your Voice, Your Choice Tingog Kabataan”.

Kanhi  kolumnista si DJ Ram sa BNH Hugyaw kung diin hisgutan niya ang mga kasikas sa bisrock scene.

Ang iyang kulom nag-ulohan og BISROCK RAKRAKAN nga gikahinaman pag-ayo kaniadto sa readers sa Banat News Hugyaw gumikan kay duna’y mga adlaw nga mag-post siya og lyrics sa Bisrock song.  (Sanden J. Anadia)