12 Finalists sa CebuPop

CEBU, Philippines - Kagahapon, Biyernes, Septiyembre 20, gikan sa alas 10 sa buntag hangtod sa alas 5 sa hapon, didto sa Univ. of the Visayas Alumni Office, gihimo ang screening sa 138 ka awit (total number of entries) alang sa ika-34 nga Cebu Popular Music Festival sunod tuig. Apan ang mga screeners mipili lamang og upat ka awit alang sa tulo ka kategoriya nga mao ang Upbeat/Dance Music, Ballad/Pop Ballad ug Folk/Country/Novelty.

Ang mosunod maoy napili isip mga finalists:

Sa Upbeat/Dance Music: I Love Cebu (composer: Russel Alegado), Lakat Panginabuhi (composer: Bienvenido Racho), Huning Sugboanon (composer: Manolito Languido) ug Ceboom (composer: Dennis Martin).

Sa Ballad/Pop Ballad: Ayaw Ako’g Biyai (composer: Jerald Decem Castro), Hagawhaw (composer: Rene Campomanes), Damgohon Ko Na Lang (composer: Archie Lesiguez) ug Hain Na Ang Saad Mo? (composer: Ogie Melgar).

Sa Folk/Country/Novelty: Limpya Botas (composers: Franklin Padayogdog, Carlito Betito ug Roy Tabasa), Baha (composer: Emmanuel Abellana), Sakay Na Kamo (composer: Arman Mahinay) ug Laylay sa Bukid (composers: Ronil Vincent Watin ug Yoogin Raye Anthony).

Ang mga screeners mao sila si Irving Guazon, Elvis Somosot, Britz Briones, Roy Caballero, Maria Donna, Girlie Laspiñas, Baby Condeno, Chline Diagon ug Sam Costanilla. Mitambong usab sa screening sila si Manlalaban Joseph "Dodong" Baduel, executive director sa Cebu Pop, Didi ug Ann Gullas ug Manlalaban Pat Acabodillo.

Ang Cebu Pop tinuig nga proyekto sa Cebu Arts Foundation, Inc. nga gipanguluhan ni kanhi Kongresista Eduardo R. Gullas.Tampo nga artikulo ni Sam Costanilla

"Politics is not our business"

Wala palutsa ni Bb. Pilipinas Charities Inc. chairperson Stella Araneta ang pangutana kabahin sa relasyon sa China ug Pilipinas nga gibato ngadto kang Bb. Pilipinas-Tourism Cindy Miranda atol sa send-off presscon para niini adtong Biyernes. Suma pa ni Araneta "Politics is not our business." Sa China ipahigayon ang Miss Tourism Queen International ug milarga na si Cindy kagahapon.

Hilom Osang!

Gipahilom ni Lolit Solis si Rossana Roces kay aron matud pa dili kini musamot og kaunlod sa kalapukan nga nahimutangan niini karon. Giingnan pud niya kini sa Startalk kagahapon nga mubalik sa Pegasus aron makatigom og milyones nga ibayad sa damages human kini nahukmang guilty sa kasong breach of contract nga gipasaka sa GMA-7 batok niini niadtong 2005.

Trabaho sa Mark

Nag-abot sa first birthday party sa anak nila Katrina Halili ug Kris Lawrence ang kanhi manag-uyab nga sila Mark Herras ug Ynna Asistio ug wala matud pa sila kiwawi sa ilang sitwasyon. Apan matud ni Mark, dili sa gayud siya musulod og bag-ong relasyon gumikan kay ipunting niya ang iyang panahon sa iyang career. Kagahapon maisip nga Mark Herras Day sanglit milugwa siya sa "Maynila" pagka buntag, siya maoy bida sa pilot episode sa "Bingit" pagka hapon ug siya maoy bida sa "Magpakailanman" kagabii nga kabahin sa kinabuhi ni Rez Cortez.

Hingpit nga kagawasan

Napangulbaan si Kylie Padilla gumikan kay dili na matud pa manghilabot ang iyang amahan nga si Robin niya, gihatagan na matud pa siya og hingpit nga kagawasan. Gumikan niini, doble nga pagmatngon matud pa ang iyang buhaton kay siya na lang ang responsabli sa iyang mga desisyon sa kinabuhi.

Ai Ai dili friend si Osang

Pagtekang ni Ai Ai delas Alas sa Startalk kagahapon aron mag-promote sa pelikulang "Kung Fu Divas" nga sila ni Marian Rivera ang mga bida ug producers, giingnan siya sa usa sa mga hosts nga si Lolit Solis nga pahuwamon og kwarta si Rossana Roces aron makabayad kini sa damages nga gimando sa korte nga kinahanglang bayran niini. Diretso ang tubag ni Ai Ai: Ayaw ko, hindi ko siya kaibigan!

Tan-awa usa

Panawagan ni Kristoffer Martin nga sa dili pa sila hukman tan-awon una unta ang ilang teleserye ni Julie Ann San Jose nga "Kahit Nasaan Ka Man" nga maoy hulip sa AnnaKareNina sugod ugma puhon sa gabii. Unang panagpares kini nila ug hangyo niya nga hatagan sila og chance, ilabi na nga naandan na nga si Elmo Magalona ang kanunay pares ni Julie Ann kaniadto.

"Word of God"

Wish ni Katrina Halili para sa iyang anak nga si Katrence mao nga magdako kini nga magtamod sa "Word of God" aron matud pa kumpleto ang kinabuhi niini. Samtang si Kris Lawrence nanghinaot nga mudako kini nga "happy girl."

No to movie

Okay na gyud matud pa sila Angel Locsin ug Marian Rivera human sa ilang pictorial para sa Rogue Magazine. Hinuon wala man gayud sila mag-away, pero ang ilang masig ka fans  maoy nagpasabong nilang duha. Apan dili pa andam si Angel nga muhimo og pelikula kauban si Marian, ilabi na kun himuan ra pud kini og isyu sa ilang fans.

Dennis gibalibaran sa Star Cinema

Posibling muhimo og pelikula sa Star Cinema si Dennis Trillo sa dili madugay, apan gibalibaran ang ilang hangyo nga unta si Angel Locsin ang mamahimo niining leading lady. Kini kay ma-busy na matud pa si Angel sa taping nila ni Jericho Rosales para sa umaabot nga teleserye ug may shooting pa kini para sa movie nila ni Vhong Navarro.

Teleserye ni Paolo

Teleserye nga kauban sila Joel Torre ug Janice de Belen ang next project ni Paulo Avelino sa ABS-CBN. Kahinumduman nga unang nabalita nga si Angel Locsin ug Paulo ang magpares sa usa ka teleserye, apan gitangtang siya sa cast ug gihulipan ni Jericho Rosales.

No big deal

Gipakagamay ni Benjamin Alves ang mga komentaryo nga nasapawan niya sa aktingan si Paulo Avelino sa pelikula nila ni Lovi Poe nga "Sana Dati" directed by Jerrold Tarog. Nagpasalamat siya, apan iyang giklaro nga importante para niya nga mahatagan og katumanan ang unsay pangayuon sa director gikan niya.