Pelikula ni Sam nagkahanap

CEBU, Philippines - Kalit lang nga nahilom ang pelikula nga pagabidahan unta ni Sam Pinto nga remake sa Angela Markado. Giingong wala na kadawat og update si Sam kung ipadayon ba o dili ang maong pelikula sa Viva Films. Una kini nga gidala niadto ni Hilda Koronel nga nakadawat og pasidungog sa usa ka film festival sa laing nasud.

Ekstra gikahinaman pag-ayo

Giingong naproblema ang producer sa indie movie ni Vilma Santos nga Ekstra gumikan kay hapit na mahurot  ang ticket alang sa gala night niini karong July 28 sa CCP main Theater apan daghan sila’g nadawat nga hangyo nga buot mosaksi niini apan dili tanan ang ma-accommodate gumikan kay limitado lang ang  lugar.

Angeline sa MMK

Si Angeline Quinto maoy bida sa Maalaala Mo Kaya ugma sa gabii kung diin modala siya sa karakter isip mapinanggaon nga anak ug ni-sideline  pagka-clown sa nagkadaiyang birthday party aron lang gyud siya makasuportar sa iyang pagtungha. Nalakip usab sa maong episode sila si  Irma Adlawan, Joey Marquez, Bea Basa, Aldred Gatchalian, Michelle Vito, Deborah Sun, Gio Alvarez, Tanya Gomez, Marc Solis, Ingrid Dela Paz, K-La Rivera, Rufami, ug Roden Araneta. (Sanden J. Anadia)

Kausaban sa airing

Dili pa segurado kung madayon ba karong September ang airing sa Got To Believe gumikan kay hangtud pa diay sa October ang pagpasalida sa Juan Dela Cruz  nga mao unta ang pulihan sa nahisgutang serye nga pagabidahan nila ni Kathryn Bernardo ug Daniel Padilla.

GGV wagtangon?

Nitumaw karon ang mga hungihong nga matud pa wagtangon na ang programa ni Vice Ganda matag Domingo sa gabii nga Gandang Gabi Vice. Giingong gihuna-huna pa karon sa mga executives sa Dos ang posibleng programa nga mahimong ihulip niini.

P300K ang tuition fee

Moabot matud pa ngadto sa P300,000 matag tuig ang tuition fee sa anak nila ni James Yap ug Kris Aquino nga si Bimby nga nagtungha sa usa ka international school.  Andam matud pa motubag si James niini gumikan kay mao man kini ang kasabotan nila ni Kris.

Jessy gipasalamatan ni Matteo

Nagpasalamat si Matteo Guidicelli ngadto sa kanhi niya girlfriend nga si Jessy Mendiola gumikan sa tinud-anay nga paghigugma niini ngadto kaniya. Gihimakak usab sa aktor nga matud pa siya maoy nakigbuwag kang Jessy.

Vilma hadlok magpa-stem cell

Giangkon ni Governor Vilma Santos-Recto nga mahadlok siya nga magpa- stem cell ilabi na nga duna siya’y nadunggan nga mga taho  nga dili maayo kalabot  niini. Giklaro hinuon niya nga dili siya supak sa stem cell apan lahi ra gyud kung maneguro daan.

Madam Auring pasok Raketeros

Adunay espesyal nga partisipasyon si Madam Auring sa comeback movie ni Quezon City Mayor Herbert Bautista nga Raketeros. Todo promote si Madam Auring sa maong pelikula bisan pa man nga wala pa kini final nga playdate.

Victor na-crush ni Empress

Giangkon sa TV 5 talent nga si Victor Silayan nga na-crush siya sa Kapamilya star nga si Empress. Malantawan si Victor sa seryeng Misibis Bay sa TV 5.

Bise mayor bag-ong uyab ni Rich

Politiko ang gikatahong uyab karon ni Rich Asuncion ug opisyal kini sa Cabugao, Ilocos Sur nga si Vice Mayor Dj Savellano. Giingong nagkaila ang duha sa dihang adunay show si Rich sa maong dapit sa miaging buwan.

Charice nagpausab  sa hairstyle

Giusab na sa singer nga si Charice ang iyang hairstyle isip preparasyon sa upcoming niya nga album. Dili na kini susama sa estilo sa buhok ni Daniel Padilla. Pinabarog na ang buhok karon ni Charice ug lalaki na siya nga lantawon. (Sanden J. Anadia)

Alessandra bida sa Korean movie

Human nakadawat og sagunson nga acting awards, lain na pud nga international film ang usa sa gikabisihan karon ni Alessandra de Rossi. Nalakip ang aktres sa Korean film nga The Mango Tree kung diin ang pipila ka eksena niini gihimo dinhi sa Cebu. Si Alessandra ang personal choice sa direktor niini nga si Lee Soo Sung alang sa maong pelikula.  (Sanden J. Anadia)