JM, Charee, Kaye, at John pinagkaguluhan

MANILA, Philippines - Humigit-kumulang sa 6,000 katao ang dumagsa sa SM Fairview, Quezon City kamakailan para sa mall show ng isa sa pinakapinapanood na serye sa hapon, ang Angelito: Ang Bagong Yugto.

Sa pangunguna ni JM de Guzman, Charee Pineda, Kaye Abad, at John Prats ay dumagundong nga ang venue sa dami ng hiyawan ng kanilang fans. Naghandog ang apat ng kanilang bersyon ng awiting Pag-ibig at hindi pa diyan nagtapos ang sorpresa dahil si JM ay nagpaunlak pa ng isang awitin mula naman sa kanyang album. Kasama rin sa mall show ang cast ng primetime serye na Kahit Puso’y Masugatan at pinakamainit na drama sa hapon ngayon, ang Precious Hearts Romances presents Pintada. Patuloy silang panoorin tuwing hapon lalo pa’t mas lalong umiinit ang tagpo sa mu­ling pagbabalik ni Jenny (Kaye) sa bansa.

Muling magsasala-sala ang buhay nina Angelito, Jenny, at Rosalie at kakaharapin ang mga tanong na matagal ng naghihintay ng kasagutan. May nararamdaman pa ba si Jenny kay Angelito? Aaminin ba ni Angelito ang isang gabing pinagsaluhan nila ni Jenny noon? Magagawa bang magtiwala ni Rosalie sa asawa gayong minsan ng minahal ito ni Jenny? Hanggang kailan itatago ni Jenny ang pagdadalang tao niya sa anak ni Angelito?

Huwag bibitaw sa gumagandang kuwento ng Angelito: Ang Bagong Yugto, Lunes hanggang Biyernes, pagkatapos ng It’s Showtime sa Kapamilya Gold ng ABS-CBN.