Lider ng tribal gang, iba pa, kakasuhan

MANILA, Philippines - Sasampahan ng ka­uku­lang kaso ang isa sa lider ng tribong Manobo na res­ponsable sa pagbihag sa 75-katao sa bayan ng Pros­pe­ridad, Agusan del Sur.

Ayon sa tagapag­salita ng PNP na si P/Chief Supt. Leonardo Espina, ito’y matapos na palayain ng grupo ni Ondo Perez, ang nalalabi pang 46 bini­hag kung saan nakipagne­go­sasyon ang Crisis Management Committee na pina­mumunuan ni Agusan del Sur Governor Valentina Plaza.

Kabilang sa kasong isa­sampa laban kay Perez at iba pa, kidnapping with serious illegal detention at illegal possession of firearms na isusumite sa opi­sina ng piskalya.

Bagaman napagka­sun­duan ng mga negosya­dor at ni Perez na litisin sa tribal court ang kaso ay may pa­nanagutan pa rin ito sa ba­tas sa ilalim ng Revised Penal Code Article 297 o ang kidnapping with serious illegal detention.

Isasailalim naman sa masusing ebalwasyon ng lokal na korte ang resulta ng paglilitis laban sa grupo ni Perez na nasa ilalim na ngayon ng kustodya ng pulisya matapos nitong palayain ang mga bihag.

“Now it will undergo processing and this would be also of course subject to the approval of the regional trial court presently in charge of trying this particular case once approved, it will be tried by the Manobo court and then after verdict it would be returned back to the RTC,” paliwanag pa ni Espina.

Samantala, patuloy na­man ang hot pursuit operation upang disarmahan ang grupo ni Jun Tubay na sang­kot sa pagmasaker sa mga magulang ni Perez na na­ging ugat ng marahas na hostage-drama.

Noong Huwebes ay hi­nostage ng grupo ni Perez ang may 75 katao kabilang ang mga guro at estu­dyante sa Barangay San Agustin, Prosperidad.