Heat reresbak sa Nuggets sa game 2

DENVER - Halos napagdaanan na ng Miami Heat ang lahat ng matitin­ding pagsubok bago nakapasok sa 2023 NBA Finals.

Natalo sila sa Atlanta Hawks sa play-in tournament, naungusan ang Chicago Bulls sa elimination play-in game at muntik masayang ang kinuhang 3-0 lead laban sa Boston Celtics sa Eastern Confe­rence finals.

“That’s just how our path has been,” wika ni Heat guard Caleb Martin matapos ang 93-104 kabiguan sa Nuggets sa Game One ng NBA Finals.

“That’s everybody’s comfort zone. We’re never worried in situations like this. People might be sa­ying it’s going to be tough or whatever the case may be, but we don’t think like that. We’re going to be ready, ” dagdag pa ni Martin.

Masama ang naging outside shooting ng Miami sa series opener.

Nagtala si Martin ng 1-of-7 clip sa three-point area habang may 0-of-9 naman si Max Strus.

Sa kabila ng pagkatalo ay kumpiyansa si Strus na makakatabla sila sa Game Two bukas ng umaga (Manila time).

Ito rin ang pakiramdam ni center Bam Adebayo na humakot ng 26 points at 13 rebounds sa Game One.

“I feel like we’ll bounce back,” sabi ni Adebayo na nabigong pigilan si two-time NBA MVP Nikola Jokic sa una nilang duwelo sa championship series.

Tumapos si Jokic na may triple-double na 27 points, 14 assists at 10 rebounds habang may 26 markers at 10 assists si Jamal Murray.

Inaasahang mas magiging agresibo ang Miami sa Game Two, lalo na si star Jimmy Butler na umiskor lamang ng 13 points.