Green Archers diretso sa semis
MANILA, Philippines — Sinikwat ng EcoOil-La Salle ang huling semifinal ticket matapos kaldagin ang Wangs Basketball @27 Strikers-Letran, 102-79, sa pagtatapos ng elimination round play sa 2023 PBA D-League Aspirants’ Cup kagabi sa Ynares Sports Arena sa Pasig City.
Rumatsada agad ang reigning champions sa 21-7 birada bago apulahin ang mainit na sagot ng Knights upang maselyu-han ang No. 2 seed hawak ang 5-1 kartada.
Makakasama ng Green Archers na diretso agad sa Final Four ang Marinerong Pilipino-San Beda, na nasiguro ang primera puwesto sa parehong kartada bunsod ng 82-79 panalo sa elims.
“We’re lucky to be in the semis. It’s about time to reward the boys for the hardwork they’re doing but it’s still part of the process,” ani assistant coach Gian Nazario.
Matapos ang maalab na simula, bahagyang tumirik ang La Salle sa 25-19 subalit sumagot agad ng 30-15 balikwas upang makapagbaon ng malaking 55-34 abante sa halftime na hindi na nila binitawan pa.
Nagbuslo ng 21 puntos si Kurt Reyson para sa Knights, na bagama’t bigo ay nakuha ang No. 4 seed para sa twice-to-beat advantage sa quarterfinals kontra sa No. 5 na Centro Escolar U simula sa Martes sa Paco Arena.
Tabla ang Perpetual, Letran at CEU sa 3-3 kartada subalit nakaungos ang Perpetual at Letran dahil sa mas mataas na quotient upang masikwat ang twice-to-beat incentives.
- Latest
