Hiyasmin (275)
“TOTOO? Magpapakasal na kayo next month, Hiyasmin?’’ tanong ni Lira na hindi makapaniwala.
“Oo ‘Ma. Bakit parang hindi ka makapaniwala na magpapakasal na kami ni Dax?”
“Wala naman, Hiyasmin. Kasi’y naiinip na ako. Gusto ko talaga makasal na kayo.”
“Plantsado na kasi ang plano namin. Naisaayos na namin ang lahat kaya wala nang atrasan sa susunod na buwan.”
“Oo nga po Tita, next month na kami magpapakasal ni Hiyasmin,’’ sabi ni Dax. “Lahat po ay naisaayos na namin. Nakahanda na ang lahat.”
“E wala pa akong isusuot na damit,” sabi ni Lira.
“Meron na, ‘Ma. Ako na ang pumili nang isusuot mo. Magugustuhan mo.’’
“Baka hindi magkasya sa akin?”
“Kasya. May pinagtularang damit mo kaya hindi magkakamali. Lihim akong kumuha ng damit mo at yun ang pattern. Tamang-tama ang sukat.”
“Nasaan ang damit?”
“Nasa bahay. Dadalhin namin dito sa isang araw.”
“Sinorpresa n’yo ako ah.”
“Ganun kami kabilis magplano ni Dax.”
“E ang nanay ni Dax, meron na ring isusuot?”
“Meron na ‘Ma.”
“Talagang ginulat n’yo ako.”
Nang tumayo si Dax at magtungo sa comfort room, may sinabi si Lira kay Hiyasmin.
Nakamaang si Hiyasmin.
“Ang totoo sasabihin ko talaga sa inyo kanina na magpakasal na kayo ngayong taon at huwag nang ipagpapaliban pa—sabi sa akin ni Siony.”
“Bakit daw ‘Ma?”
“Sabi ni Siony mayroon daw hahadlang.”
“Ano raw hadlang?”
“Hindi sinabi. Kaya ang payo niya, ngayong taon na magpakasal. Kaya nang ibalita ninyo na magpapakasal na kayo, natuwa ako.”
“Ano naman kayang hadlang ang sinasabi ni Tita Siony?” tanong ni Hiyasmin na may himig pag-aalala.
Si Lira naman ang nabahala. Sana hindi na niya sinabi kay Hiyasmin ang sinabi ni Siony.
“Huwag mo na ngang isipin yung sinabi ko Hiyasmin,” sabi ni Lira. “Kutob lang naman yun ni Siony.”
“Paano ba sinabi ni Tita yun ‘Ma?”
“Kutob nga lang daw niya. Naitanong kasi sa akin kung kailan daw ang kasal n’yo at nasabi nga na dapat ngayong taon na iyon ganapin.”
Itutuloy
- Latest
