Hiyasmin (274)
“KUNG hindi pa magpapakasal ngayong taon sina Hiyasmin at Dax, baka hindi na sila magkatuluyan,’’ sabi ni Siony sa seryosong boses.
“Bakit?’’ may pangamba sa tinig ni Lira.
“Magkakaroon ng aberya na magiging dahilan nang hindi pagkakatuloy ng kanilang kasal.”
“Anong aberya yun?”
“Hindi malinaw Lira pero yun ang pagmumulan.”
“Diyos ko!”
“Kutob ko lang yan ha at hindi ko naman sinasabing 100 percent ay mangyayari. Kaya ang payo ko, magpakasal na sila ngayong taon.”
“Sasabihin ko kina Hiyasmin at Dax.”
“Pero huwag mo namang tatakutin ang dalawa.”
“Ah hindi.”
“Pero di ba sinabi mo sa akin minsan na nagpaplano na silang magpakasal?”
“Oo—may plano na sila.”
“’Yun naman pala! Idaos na nila.”
“Sasabihin ko.”
“At ang importante, huwag akong kalilimutan na hindi imbitahin. Hindi kita iimikan kapag hindi mo ako inimbitahan.”
“Siyempre naman imbitado ka.”
“Salamat, Lira. Makakatikim din ako ng handa ng dalawa.
KINABUKASAN, dumalaw sina Hiyasmin at Dax kay Lira. Tamang-tama, sasabihin niya sa mga ito na magpakasal na.
Pero hindi na pala niya kailangang sabihin sa dalawa ang mga sinabi ni Siony.
Sinabi ni Hiyasmin na magpapakasal na sila ni Dax sa susunod na buwan.
Itutuloy
- Latest
