Elijah, naholdap!

Hindi ko kilala ang young actress na si Elijah Alejo pero may nag-chika sa akin na naholdap ito habang papasok ito sa es­kwelahan.

Ikinuwento raw nito sa TikTok video niya na kinailangan niyang bumiyahe dahil meron silang tree planting activity ng araw na iyon at maaga ang kanilang call time.

Late raw siyang nagising at masama ang pakiramdam ng mommy niya kaya nag-motor taxi siya.

Nang makarating daw sila sa campus ay dapat sa loob siya magpapababa pero dahil nagpapadagdag ng bayad ang rider ay hindi na raw siya pumayag.

Sa sidewalk daw siya pinababa at hindi sa tapat ng gate ng campus nila or sa gate ng ospital nila. Pagkatapos daw niyang magbayad ay umalis na ang rider at umalis na rin siya kaagad papunta sa gate.

Pero habang naglalakad daw siya ay may naramdaman siyang bigla na matulis na bagay sa tagiliran niya. Pasimple raw siyang sinabihan nitong ibigay niya ang wallet niya.

Sa gulat at takot daw niya ay nablangko at nanigas daw ang isip niya. Kahit daw marunong siya ng iba’t ibang self-defense ay hindi na raw niya ito naalala.

Binigay niya lang ang wallet niya at laking pasasalamat niya na ligtas siya.

Ang problema lang daw ay walang CCTV sa lugar na iyon.

‘Kaloka.

Well, tama ang ginawa niya na hindi na siya lumaban.

Siyempre mas mahaga ang buhay kesa sa datung.