Patuloy na inaabangan ng mga manonod ang drama-thriller series na Lavender Fields dahil mas umiinit at tumataas ang tensyon sa pagitan nina Tyrone (Jericho Rosales) at Zandro (Albert Martinez) at sa determinasyon ni Iris (Janine Gutierrez) na madiskubre ang tunay na pagkatao ni Jasmin (Jodi Sta. Maria).
Sa ngayon, nagtutulungan sina Jasmin, Tyrone, at Zandro upang mabisto ang maruruming sikreto sa ilegal na negosyo ni Vittorio (Edu Manzano).
Ngunit hindi pa rin kumbinsido si Zandro sa intensyon ni Tyrone kaya naman kinompronta niya ito lalo pa at nag-aalala siya na magdala lang ito ng panganib sa pamilya nina Jasmin at Aster (Maricel Soriano).
Nananatili ang serye bilang isa sa Top 10 TV Shows ng Netflix PH, habang numero uno pa rin ito sa mga pinakapinapanood na palabas sa iWantTFC.
Mapua at Benilde, makasaysayan ang finale face-off!
Masasaksihan sa kauna-unahang pagkakataon sa National Collegiate Athletic Association’s (NCAA) history ang finale face-off ng Mapúa University at De La Salle-College of Saint Benilde sa NCAA Season 100 Men’s Basketball Finals. Mapapanood nang live sa GMA Network ngayong Linggo, Dec. 1, at 2 p.m., na gaganapin sa makasaysayang Araneta Coliseum.
Sabay itong ipapalabas sa GMA at Heart of Asia (HOA) at mapapanood din via livestream sa social media pages ng GMA Sports at NCAA.
Ang top-seeded na Mapúa Cardinals ay muling magbabalik sa finals ngayong centennial season matapos talunin ang LPU Pirates, 89-79. Sa pamumuno ni Coach Randy Alcantara, handang-handa na ang koponan na sungkitin ang championship crown, sa tulong nina Season 99 Rookie / MVP Clint Escamis, at ace players na sina Chris Hubilla, at Lawrence Mangubat. Layunin ng Mapua na wakasan ang 33-year title drought.
Samantala, ang Benilde Blazers ay nagpakitang-gilas sa semis laban sa San Beda Red Lions, 79-63. Ito ang unang pagkakataon mula Season 80 na hindi nakapasok ang San Beda sa finals. Sa pangunguna ni Coach Charles Tiu, ang Taft-based squad ay handa nang mag-all out, kasama ang top players nilang sina Allen Liwag, Tony Ynot, at Jhomel Ancheta. Huling nagwagi ang Blazers sa Men’s Basketball Championship 24 taon na ang nakalipas (Season 76).
Ang NCAA Men’s Basketball Finals ay ihahatid nina Synergy Sports host Martin Javier at veteran professional basketball player na si Beau Belga.
Huwag palampasin ang NCAA Season 100 Men’s Basketball Finals – Game 1 sa Disyembre 1, alas-2 ng hapon live sa GMA at HOA; Game 2 sa Disyembre 7, 2:30 ng hapon, at Game 3 (kung kinakailangan) sa Disyembre 14, 2:30 ng hapon, live sa GTV at HOA.