Toyo ang titulo ng comeback single ni KZ Tandingan na tungkol sa damdamin ng taong ‘di mapigilang mahulog muli sa taong inakala’y nakalimutan na.
Si KZ mismo ang sumulat at nagprodyus ng itinuturing niyang experimental track na alay niya para sa mga nalilito, nananatiling in denial, at tinotopak dahil nagre-relapse.
“So itong ‘Toyo’ tungkol sa isang tao na nagta-try nang mag move-on. And then one day, itong taong ito nakatanggap siya ng tawag mula sa taong tina-try niyang kalimutan. Ang tanong ngayon, bibigay ba siya?” ani KZ.
Ang operations at creative head ng ABS-CBN Music na si Jonathan Manalo ang nagsilbing supervising producer habang si Tim Recla naman ang nag-mix at master ng kanta na inilunsad sa ilalim ng Star Music.
Pormal na ipinakilala ni KZ ang awitin sa isang launch party noong Huwebes (Sep. 26) sa Takeover Lounge sa Quezon City kung saan nag-perform din ang mga bisitang sina Bryan Chong, Jel Rey, FANA, Jem Macatuno, MC Einstein, at Angela Ken.
Sinusundan ng Toyo ang 2023 single ng Kapamilya singer-songwriter na Dito Ka Lang at ang kanyang latest collaboration sa kanyang asawang si TJ Monterde na Palagi.
Napapakinggan na ang Toyo single ni KZ sa iba’t ibang streaming platforms.