Ex-ARMM regional governor, Basilan governor na
MANILA, Philippines — Iprinoklamang provincial governor ng Basilan si Congressman Mujiv Hataman matapos na mahalal sa naturang puwesto nitong May 12, 2025 elections.
Si Hataman, incumbent congressional representative ng Basilan, ay na-proklamang wagi sa kanyang kandidatura sa pagka-governor ng probinsya ng mga kinatawan ng Commission on Elections at mga kasapi ng provincial board of canvassers sa kapitolyo ng Basilan nitong Miyerkules.
Naging regional governor ng dalawang termino si Hataman ng Autonomous Region in Muslim Mindanao na nabuwag at napalitan nitong 2019 ng mas makapangyarihang Bangsamoro Autonomous Region in Muslim Mindanao batay sa kasunduang pangkapayapaan ng Malacañang at ng Moro Islamic Liberation Front.
Kinumpirma nitong Biyernes ni Atty. Ray Sumalipao, regional director sa BARMM ng Commission on Elections, na tinalo ni Hataman sa gubernatorial race sa Basilan ang kanyang pamangkin na si Jay Salliman.
Nahalal din bilang vice governor ng Basilan ang ngayon ay third termer na si Governor Hadjiman Salliman.
Ang kabiyak ni Hataman na mayor ng Isabela City sa Basilan na si Sitti Djalia Turabin-Hataman, ay na-reelect din na mayor ng naturang lungsod. (John Unson)
- Latest
