Pamamaril sa canvassing: 1 utas, 1 sugatan!

MANILA, Philippines — Patay ang isang residente habang isa pa ang sugatan sa pamamaril sa labas ng canvassing area habang naghihintay ang mga tao ng resulta ng botohan nitong Lunes ng gabi sa bayan ng Tubigon, Bohol.

Sa ulat ng Bohol Police, kinilala ang nasawi na si Daniel Carnece ng Brgy. Los Angeles, Ubay, Bohol; agad binawian ng buhay sa tinamong mga tama ng bala sa tiyan, ulo at dibdib.

Patuloy na nilalapatan ng lunas sa pagamutan ang isang 42-anyos na sugatang biktima.

Bandang alas-8:30 ng gabi habang ang mga biktima kasama ang iba pang mga tao ay naghihintay ng resulta ng botohan sa Brgy. Guiwanon, Tubigon ng bigla na lang pagbabarilin ng isang lalaking may nakatagong baril sa baywang.

Matapos ang pamamaril sa target na si Carnece ay mabilis na tumakas ang suspect.

Nagsasagawa na ng masusing imbestigasyon sa kasong ito ang pulisya habang ipinag-utos na rin ni P/Col. Arnel Banzon, director ng Bohol Provincial Police Office (PPO) ang pagtugis sa suspect.

Pinaniniwalaan namang isang malalim na alitan sa pagitan ng biktima at ng suspect ang motibo ng pamamaril.