RAGAY, Camarines SuR, Philippines — Idineklarang dead-on-arrival sa ospital ang apat katao na pawang magkakamag-anak matapos mahulog sa tulay ang kotseng sinasakyan sa kahabaan ng Andaya National Highwaysa Brgy. Panaytayan ng bayang ito, kamakalawa.
Kinilala ang mga nasawi na sina Melchor Año Dejillo; Salve Año Dejillo; Mary Ann Pradil Morata; kapwa nasa hustong gulang; at Kriza Dejillo,15, pawang residente ng Brgy. F. Simeon.
Bago naganap ang aksidente, ala-1:00 ng hapon ay mabilis na binabagtas ng kotseng Nissan Cefiro (JCZ-888) na minamaneho ni Melchor ang kahabaan ng highway pauwi mula Naga City.
Pagdating sa pakurbang daan ay nawalan umano ito ng kontrol sa manibela at bumangga ang sasakyan sa bakal na railings bago ito nahulog sa malalim na tulay.
Agad sinaklolohan ng mga residente ang mga biktima at isa isang walang malay na nailabas sa kotseng lumubog na sa tubig at isinugod sa pagamutan pero lahat ay hindi na umabot nang buhay.