BULACAN, Philippines – Bagsak kalaboso ang isang lalaking lulong sa shabu at nabugbog pa ng taumbayan matapos na i-hostage nito ang mag-asawang matanda habang kumakain sa loob ng kanilang bahay sa Brgy. Minuyan Proper, San Jose Del Monte City, Bulacan kagabi.
Kinilala ang suspek na si Michael Magdarayo, 38, obrero at residente ng Brgy. Bagong Silang sa Caloocan City at miyembro ng notoryus na akyat bahay gang.
Nagtamo naman ng trauma at kaagad na isinugod sa Sapang Palay District Hospital upang malapatan ng lunas ang mga biktimang sina Luz Barotil, 70, at asawa nitong si Francisco Barotil, 67, kapwa mga residente ng Towerville, Brgy. Minuyan Proper sa bayang ito.
Sa report ni P/Supt. Charlie Cabradilla dakong alas 6:45 ng gabi habang kumakain ng hapunan ang mag-asawang biktima kasalo ang kanilang mga kaanak ay biglang nagkagulo sa labas ng kanilang bahay nang biglang pumasok ang suspek na hinahabol ng taumbayan dahil sa ginawang panloloob nito sa isa pang bahay sa naturang lugar.
Kaagad namang nagresponde ang pulisya at nasakote ang suspek.