HD Spikers nakauna sa PVL on Tour
MANILA, Philippines — Kaagad napakinabangan ng Cignal HD ang mga bagong hugot na sina Erika Santos at Tin Tiamzon sa 25-23, 25-14, 25-23 demolisyon sa Akari sa paghataw ng 2025 Premier Volleyball League (PVL) on Tour kahapon sa Chavit Coliseum sa Vigan, Ilocos Sur.
Nagtala si Santos, dating naglaro para sa PLDT High Speed Hitters, ng 14 points, habang may 11 markers at 14 receptions si Tiamzon para sa 1-0 record ng HD Spikers sa Pool B.
“Same goal lang pero ibang team,” wika ni Santos. “Gusto ko lang talaga mag-grow as a volleyball player. Mag-aaral at hindi titigil dahil hindi naman ito natatapos sa isang game.”
Nag-ambag si Ishie Lalongisip ng siyam na puntos at may walo, pito at limang marka sina Roselyn Doria-Aquino, Jackie Acuña at Gel Cayuna, ayon sa pagkakasunod.
Pinamunuan naman ni Eli Soyud ang Chargers sa kanyang 12 points kasunod ang 11 markers ni Grethcel Soltones.
May siyam na puntos si Ivy Lacsina kasunod ang limang marka ni Ced Domingo.
Pupuntiryahin ng Cignal ang ikalawang sunod na ratsada sa pagsagupa sa Capital1 Solar Energy ngayong alas-4 ng hapon sa parehong venue.
Haharapin naman ng Akari ang Creamline sa alas-6:30 ng gabi.
- Latest
