Thunder kakasa sa Timberwolves sa West finals

OKLAHOMA CITY — Lalabanan ng top-seeded Thunder ang sixth-seeded Minnesota Timberwolves sa Western Conference best-of-seven cham­pionship series.

Ito ay matapos kumamada si Shai Gilgeous-Ale­xander ng 35 points para igiya ang Oklahoma City sa 125-93 pagpapatalsik sa Denver Nuggets sa Game 7 ng kanilang semifinals showdown.

Nagdagdag si Jalen Williams ng 24 markers sa pagsagupa ng Thunder sa Timberwolves sa conference finals na magsisimula bukas.

“We’re better now than we were at the beginning of the series, and it’s because of them,” sabi ni OKC coach Mark Daigneault. “They pushed us to the limit.”

Ito ang unang conference finals ng tropa ni Daigneault sapul noong 2016.

Nagposte ang Thunder ng league-best 68-14 sa regular season para maging pinakabatang koponang nanalo ng 60 games.

Inungusan ng Thunder si three-time MVP Nikola Jokic at ang Nuggets na nagkampeon noong 2023.

Humakot si Jokic ng 20 points, 9 rebounds at 7 assists para sa Denver habang may 11 borads at 8 markers si Aaron Gordon na naglaro na may strained left hamstring.

Kinuha ng Nuggets ang isang 11-point lead sa first quarter bago humataw ang Thunder ng 39 points sa second quarter para ilista ang 60-46 halftime lead.

Tinawagan si Gordon ng flagrant-1 foul sa pagsiko sa mukha ni Gilgeous-Alexander sa third quarter.

Ipinasok ni Gilgeous-Alexander ang dalawang free throws kasunod ang short jumper ni Williams para sa 66-46 bentahe ng Oklahoma City patungo sa 78-57 pagtambak sa Denver.