Pacquiao magsasanay na sa Amerika?

MANILA, Philippines — Nasa Amerika si boxing champion Manny Pacquiao na posibleng maghahanda na para sa kanyang ring return.

Isa rin sa mga posibleng aktibidad nito sa Amerika ang pagdalo nito sa International Boxing Hall of Fame sa Hunyo 5 hanggang 8 sa New York City.

Kasama nito ang asawang si Jinkee kung saan sinalubong ang dalawa ng kanyang panganay na anak na si Jimuel na kasalukuyan nang naninirahan sa Amerika.

Natalo si Pacquiao sa senatorial race sa katatapos na midterm elections kung saan hindi ito nakapasok sa Magic 12 matapos pumuwesto sa No. 18 bunsod ng nalikom nitong mahigit 10 milyong boto.

Sa kabila ng kabiguan, nagpasalamat si Pacquiao sa lahat ng sumuporta sa kanyang kandidatura.

Wala pang linaw sa mga susunod na hakbang ni Pacquiao. Subalit nauna nang napaulat na magba­balik-aksyon ito sa professional boxing matapos ang ilang taong pagreretiro nito.

Ayon sa mga balita, target ni Pacquiao na makalaban si reigning World Bo­xing Council welterweight champion Mario Bar­rios.

Planong ganapin ang Pacquiao-Barrios fight sa Hul­yo 19 sa Las Vegas, Nevada.

Ngunit wala pang pormal na anunsiyo ang kampo ni Pacquiao.

Maaaring ang pagbisita nito sa Amerika ang pagsisimula ng training camp ng Pinoy boxing champion dahil ilang linggo na lamang ang nalalabi bago ang July 19 fight sakalingmatuloy ito.

Huling lumaban si Pacquiao sa professional bo­xing noong Agosto 21, 2021 kung saan natalo ito kay Yordenis Ugas ng Cuba via unanimous decision sa T-Moble Arena sa Las Vegas, Nevada.

Sumalang din si Pacquiao sa ilang exhibition matches kabilang na ang laban nito kontra kay South Korean martial artist DK Yoo noong Disyembre 11, 2022 sa Korea International Exhibition Center sa South Korea kung saan nanalo ang Pinoy via unanimous decision.