NLEX sinagasaan ang Terrafirma

MANILA, Philippines — Sinagasaan ng NLEX ang Terrafirma, 117-87, para dumiretso sa pang-limang sunod na panalo sa Season 49 PBA Philippine Cup kahapon sa Ninoy Aquino Stadium sa Malate, Manila.

Patuloy na sinolo ng Road Warriors ang second spot sa kanilang 5-1 record kasabay ng paghuhulog sa Dyip sa ikaanim na dikit na kamalasan matapos ilista ang unang panalo sa pagbubukas ng torneo.

Umiskor si rookie forward Brandon Ramirez ng 21 points para pamunuan ang NLEX habang may 17, 15 at 13 markers sina JB Bahio, Robbie Herndon at Javee Mocon, ayon sa pagkakasunod.

“Everybody played well, everybody was in the right mindset. But in the course of the game you see complacent lapses that results to some mistakes,” ani coach Jong Uichico. “I think we should play smarter than that one.”

Pinangunahan ni Kevin Ferrer ang Terrafirma sa kanyang 23 points kasunod ang 15 markers ni Louie Sangalang.

Maagang humarurot ang Road Warriors matapos ilista ang 28-7 bentahe sa 3:23 minuto ng first period galing sa three-point shot ni 6-foot-6 Mike Miranda.

Bagama’t umiskor si Ferrer ng 19 points, tampok dito ang limang triples, ay bigo ang Dyip na makadikit sa halftime, 44-63.

Sa fourth quarter ay hindi na pinadikit ng tropa ni Uichico ang Dyip.