Tour of Luzon: ‘Great revival’ dating waiter wagi sa Stage 5
CLARK, Philippines — Sa sobrang hirap makawala mula sa isang seven-man lead pack ay naisip na ni Joseph Javiniar ng Excellent Noodles Cycling Team na bumitaw sa labanan.
Ngunit nang makasilip ng butas para rumemate ay hindi na ito pinakawalan ng tubong Pagsanjan, Laguna.
Nagrehistro si Javiniar ng tiyempong tatlong oras, 29 minuto at 20 segundo para pagharian ang 166.65 Clark-Clark Stage 5 ng 2025 MPTC Tour of Luzon kahapon sa Filinvest Mimosa Acacia Drive sa Clark, Pampanga.
“Hindi ko ine-expect na mananalo ako,” ani ng 25-anyos na si Javiniar. “Sobrang hirap ng breakaway from start to finish. Kanina lang nu’ng paahon, pakiramdam ko umaatras ako. Tiniis ko na lang talaga.”
Inungusan ni Javiniar sa finish line sina Jonel Carcueva ng MPT Drivehub at Marc Ryan Lago ng Go For Gold Cycling Team na parehong may 42 segundo ang agwat.
“Last five kilometers kumawala na po ako. Bale pito po kami na nag-breakaway sa Sacobia Bridge (Mabalacat, Pampanga),” dagdag ni Javiniar sa kanyang panalo sa eight-stage race na inihahandog ng DuckWorld PH at Cignal katuwang ang Pilipinas Live, Meralco, Maynilad, Metro Pacific Health, Megaworld, Landco, PLDT at Smart.
Dating waiter sa Pagsanjan si Javiniar at noong 2021 ay nagdesisyong maging isang full-time cyclist ng Excellent Noodles.
Nakatakdang humarurot ngayong umaga ang 168.19 Clark-Lingayen Stage 6 kasunod ang 15.14-km individual time trial Labrador-Lingayen Stage 7 at ang 172.53-km Lingayen-Baguio City Stage 8.
Samantala, komportable pa rin si Joo Dae Yeong ng Gapyeong Cycling Team sa pagsuot ng yellow jersey sa individual general classification.
Nakaipon ang 29-anyos na si Joo ng 14:07:40 kasunod sina Ronald Oranza (-0:04:40) ng Standard Insurance Philippines, Mendoza (-0:04:36) ng Go for Gold, Dominic Perez (-0:04:43) ng Exodus Army Cycling Team at Mervin Corpuz (-0:04:44) ng MPT Drivehub.
Bumabandera pa rin ang Standard Insurance Philippines sa team general classification sa kanilang 56:50:50 sa itaas ng MPT Drivehub (-0:00:19), Go for Gold (-0:00:55), Exodus Army (-0:01:20) at 7-Eleven Cliqq Roadbike Philippines (0:01:52).
- Latest
