Letran pakay ang liderato sa EAC
MANILA, Philippines — Sisikapin ni Sheena Vanessa Sarie na maitaguyod sa panalo ang Letran pagharap nila sa Emilio Aguinaldo College sa NCAA Season 100 women’s volleyball tournament na lalaruin sa FilOil Arena sa San Juan ngayon.
Pakay ni Sarie at ng Lady Knights na masolo ang tuktok ng team standings at mapatibay ang pagkapit sa No. 1 spot.
Sa alas-11 ng umaga ang simula ng paluan ng bola sa pagitan ng Letran at EAC, sunod ang bakbakan ng Lyceum of the Philippines University at Mapua University sa alas-2:30 ng hapon.
Hawak ng Intramuros-based squad ang 9-2 karta, kapareho nila ang defending champion College of Saint Benilde kaya asahang itotodo ng una ang laro para makakawala sa huli.
Makakatulong ni Sarie sa opensa sina Gia Marcel Maquilang, Verenicce Colendra, Natalie Marie Estreller at Marie Judiel Nitura para sikwatin ang panalo sa EAC.
Noong Sabado ay kumana sina Sarie at Maquilang ng tig-14 points upang akbayan ang Letran sa panalo kontra tigasing University of Perpetual Help System DALTA, 27-25, 25-23, 25-21 noong Sabado.
Paniguradong mahihirapan ang Lady Knights bago nila mapayuko ang Lady Generals na determinadong umusad sa susunod na phase sa torneong may 10-team double round robin.
Hawak ng EAC ang 3-8 karta kaya malaki pa ang tsansa nila sa asam na makapasok sa semis.
- Latest
