E-Painters pinintahan ang Bolts

MANILA, Philippines — Lalong pinasadsad ng Rain or Shine ang reig­ning champion na Meralco matapos ang 128-116 dominasyon kahapon sa 2025 PBA Philippine Cup sa Ynares Sports Center sa Antipolo.

Sumandal ang Elasto Painters sa 36-23 birada sa second quarter upang kaldagin ang Bolts na nalasap ang ikatlong sunod na panalo nito upang malaglag sa 2-3 kartada sa tangka nitong madepensahan ang korona.

Balanseng atake ang pinamalas ng Elasto Pain­ters upang masilat ang Bolts sa pangunguna ng 27 puntos ni Santi Santillan sahog pa ang 7 rebounds, 2 assists at 3 tapal.

Nagmartsa sa duwelo ang ROS na wala sina Ketih Datu, Beau Belga, Caelan Tiongson at Shaun Ildefonso subalit nagawa pa ring silatin ang defending All-Filipino kings.

Umalalay para sa mga bataan ni coach Yeng Guiao sina Gian Mamuyac at Adrian Nocum na may tig-24 puntos habang may 13, 12 at 10 puntos sina Felix Pangilinan-Lemetti, Gabe Norwood at Jhonard Clarito, ayon sa pagkakasunod.

Abante lang ng 66-59 ang ROS sa halftime bago apulahin ang kuryente ng Bolts sa second half kung saan sila lumamang ng hanggang 20 puntos tungo sa bigating tagumpay.

Talon ngayon ang ROS sa 2-1 kartada matapos din ang unang 113-96 panalo kontra sa kapwa Commissioner’s Cup semifinalist na NorthPort bago ang PBA break para sa Semana Santa upang mabilis na maiganti ang 109-95 debut loss kontra sa NLEX.