Vietnamese team sa AVC Final Four

MANILA, Philippines — Inangkin ng VTV Binh Dien Long An ng Vietnam ang huling dalawang sets para talunin ang Kaohsiung Taipower ng Chinese Taipei, 25-20, 17-25, 25-22, 28-26, patungo sa semifinals ng 2025 AVC Women’s Volleyball Champions Cup kahapon sa PhilSports Arena sa Pasig City.

Haharapin ng Vietnamese squad ang mananaig sa quarterfinals game kagabi ng Petro Gazz at Baic Motor ng China para sa finals ticket.

Nauna nang nakapasok sa Final Four ang Zhetysu ng Kazakhstan at Nakhon Ratchasima QminC ng Thailand na pag-aagawan ang finals spot ngayon.

Samantala, taas-noo pa rin si libero Kath Arado bagama’t nasibak ang PLDT ng Zhetysu ng Kazakhstan, 13-25, 22-25, 20-25, sa quarterfinals noong Huwebes.

“Proud talaga ako sa ipinakita ng team,” wika ni Arado sa High Speed Hitters. “Iyong tutok kasi talaga ng bawat isa, kahit ‘yung mga coaches na talagang i-instruct talaga kami point-by-point.”

Bagsak sa 1-2 ang record ng PLDT sa torneo kung saan ang tanging panalo nila ay kontra sa Queensland Pirates ng Australia, 25-19, 25-12, 25-12, sa pool phase.