Korean rider bumida sa Stage 1

Tour of Luzon: ‘Great Revival’

PAOAY, Ilocos Norte, Philippines — Ipinakita ni Joo Dae Young ng Gapyeong Cycling Team ang kanyang lakas at eksperyensa sa pagkopo sa 190.70-kilometer Paoay-Paoay Stage One ng MPTC Tour of Luzon.

Bumanat ang 29-anyos na Korean national champion sa huling 30 kilometro para maglista ng bilis na apat na oras, 12 minuto at 45 segundo sa kanyang stage win na sinimulan at tinapos sa harap ng Paoay Church dito kahapon

“I’m used to the heat because we trained under the sun in Korea,” wika ni Joo na hindi pinansin ang matinding sikat ng araw sa pagtawid sa finish line kasunod sina Ronald Oranza ng Standard Insurance Philippines na nahuli ng apat na minuto at 32 segundo at Aidan James Mendoza ng Go For Gold Cycling Team na naiwanan ng apat na minuto at 40 segundo.

Isusuot ni Joo ang red jersey sa pagpapakawala sa team time trial Stage 2 sa Vigan City ngayong umaga sa eight-stage race na inihahandog ng DuckWorld PH at Cignal katuwang ang Pilipinas Live, Meralco, Maynilad, Metro Pacific Health, Megaworld, Landco, PLDT at Smart.

Nakipagsabayan si Jan Paul Morales ng Standard Insurance Philippines kay Joo sa pagbitaw sa peloton sa kalagitnaan ng karera.

Ngunit kumawala ang South Korean sa kanilang sukatan ng lakas ni Morales sa Bacarra na halos 30 kilometro ang layo sa finish line.

Bigo ang pambato ng Marikina City na makasama sa podium finish matapos sumemplang sa huling 400 metro ng karera na nagresulta sa kanyang mga sugat sa balikat, tuhod at binti.

Ang individual general classification champion ay tatanggap ng P500,000 habang ang team champion ay magbubulsa ng P1 milyon sa event na suportado ng Cardinal Santos Medical Center, Go21, Dongfeng, Victory Liner, DOOH, PSSLAI, Unilab, Huawei, Toyota, Microtel by Wyndham, Gatorade, Drivehub at Homestretch.

Kasunod ng Stage Two ay ang pagpadyak ng 130.33-km Vigan-San Juan Stage Three bukas.