White markado sa PAI National Tryouts
MANILA, Philippines — Desidido si Filipino-British tanker Hannah White na makahirit ng tiket sa bubuuing national junior team sa 2025 Junior National Championship-Philippine Aquatics National Tryouts na hahataw mula sa Abril 25 hanggang 27 sa Rizal Memorial Swimming Pool sa Malate, Manila.
Ang three-day event ang magiging daan ng mga bagitong Pinoy tankers upang makapasok sa Team Philippines na ilalaban sa 47th SEA Age Group Swimming Championships na gaganapin naman sa hunyo 25 hanggang 27 sa Singapore.
Malakas ang tansa ni White na makapasok sa national junior team na sasabak sa SEA Age Group dahil sa impresibong oras nito sa nakalipas na swimming tournament sa Ho Chi Minh City, Vietnam.
Sa kasalukuyan, may magagandang oras ito sa iba’t ibang events sa girls’ 13-under division.
Una na ang 100m freestyle kung saan hawak nito ang personal best na 1:00.43 na silver medal standard sa 2024 edisyon ng SEA Age Group.
Maliban dito, may tsansa rin si White sa 400m freestyle (4:45.76), 50m freestyle (27.51), 50m butterfly (29.78) at 100m butterfly (1:06.52).
Inaasahang mas mapapaganda pa ni White ang mga marka nito dahil pukpukan na ang paghahanda nito para sa national tryouts.
“Very recent, H?nnah White competes for Ho Chi Minh City swimming and her time, it’s incredibly fast for U13 category. And if she join the SEA Age Group, she might have the chance for grabbing medal for the Philippines,” ani Jenny White na nagsisilbing trainer at coach ni Hannah.
Sa katunayan, nasa Maynila ang ABC International School (ABCIS) student na si White para ipagpatuloy dito ang preparasyon nito para sa national tryouts.
Tinututukan ni Hannah ang bawat detalye sa strokes nito upang masiguro na nasa perpektong kundisyon ito para sa nasabing torneo.
‘We are very specific in every whip, every breath. And positioning is very important. They have to spend so much time fixing the small problems. Hannah is ready. We cannot wait to see her at the Philippine National Junior tryouts for SEA Age in a few days,” dagdag ni Jenny.
Kamakailan lamang ay humakot ng 12 medalya si White sa iba’t ibang events kabilang na ang pagbasag sa tatlong rekord sa swimming competition ng 2025 Fobisia Games na ginanap sa Pattana Sports Resort sa Chonburi, Thailand.
- Latest
