Beach handball, running sa PSA Forum ngayon
MANILA, Philippines — Bibisita ang Philippine teams na kumuha ng gold at bronze medals sa Southeast Asian Beach Handball Championships ngayong umaga sa Philippine Sportswriters Association (PSA) Forum sa conference hall ng Rizal Memorial Sports Complex.
Makakasama ng gold winning men’s team nina Rafael Andrew Agtarap at coach Gabriel Montini De Guzman ang bronze winning women’s team ni coach Jana Franquelli sa weekly session para ikuwento ang kanilang panalo sa February 10-12 meet sa Suphanburi, Thailand.
Sasalang din ang mga opisyales ng Women’s Run PH sa pamumuno ni founder at president Nicole Dela Cruz para sa pagdiriwang ng International Women’s Month sa Marso.
Magsisimula ang PSA Forum na inihahandog ng San Miguel Corporation, Philippine Sports Commission, Philippine Olympic Committee, MILO, Smart/PLDT at 24/7 sports app ArenaPlus sa alas-10:30 ng umaga.
- Latest
