Perpetual Lady Altas babawi sa NCAA Season 100
MANILA, Philippines — Ang magandang panimula ang hangad ng University of Perpetual Help System DALTA sa pagbubukas ng NCAA Season 100 women’s volleyball tournament sa Pebrero 20.
Sasandig si Lady Altas coach Sandy Rieta kina veterans Shaila Omipon, Winnie Bedaña, Marian Andal, Camille Bustamante, Fianne Ariola, Pauline Reyes, Jodi Lozano, Nicole Gaa at Daizerlyn Uy.
Dagdag na puwersa naman si rookie Jemalyn Menor mula sa champion team na Junior Altas Girls kasama sina Amina Villanueva, Geraldine Palacio, Loraine Lagmay, Monica Mariano, Mika Donig at reserve player Charisse Enrico.
Tumapos ang Perpetual sa ikaanim na puwesto sa kanilang 5-4 baraha sa nakaraang Season 99 at bigong makapasok sa Final Four.
Makakatuwang ni Rieta sa coaching staff sina Jason Sapin at Chi Cha Bautista.
Ang first round ay gagawing home-and-away na iikot sa 10 teams, habang sa FilOil Centre idaraos ang second round.
Ang top two squads matapos ang eliminasyon ay makakakuha ng ‘twice-to-beat’ advantage laban sa No. 3 at No. 4.
- Latest
