Suns pinalubog ng Grizzlies

PHOENIX — Bumira si Ja Morant ng 26 points at may 20 markers si Desmond Bane para banderahan ang Memphis Grizzlies sa 119-112 pagpapalubog sa Suns.

Nagdagdag si Jaren Jackson Jr. ng 17 points para sa Memphis (36-17) na nagtala ng 19-point lead bago nakalapit ang Phoenix (26-27) sa three-point deficit matapos ang three-point shot ni Bol Bol sa huling 2:34 minuto ng fourth quarter.

Ang layup ni Morant ang muling naglayo sa Grizzlies para selyuhan ang panalo sa Suns.

Hinirang si Phoenix star Kevin Durant bilang eighth player sa NBA history na naglista ng 30,000 points matapos isalpak ang dalawang free throws sa huling 1:11 minuto sa third quarter.

Tumapos si Durant na may 34 points habang may 17 markers si Devin Booker.

Sa Indianapolis, humakot si Karl-Anthony Towns ng 40 points at 12 rebounds at naglista si Josh Hart ng 30 points at 10 rebounds sa 128-115 paggupo ng New York Knicks (35-18) sa Indiana Pacers (29-23).

Ito ang unang panalo ng New York (sa Indianapolis sapul noong Abril 2023.

Sa Philadelphia, kumamada si Scottie Barnes ng 33 points kasunod ang 23 markers ni Immanuel Quickley para igiya ang Toronto Raptors (17-37) sa 106-103 paglusot sa 76ers (20-33).

Sa Chicago, nagposte si Cade Cunningham ng 20 points, 7 assists at 6 rebounds para pangunahan ang Detroit Pistons (28-26) sa 132-92 pagmasaker sa Bulls (22-32).