Leonard bumida sa panalo ng Clippers sa Thunder
LOS ANGELES — Humataw si Kawhi Leonard ng 32 points para banderahan ang Clippers sa 127-105 pagpapatumba sa Oklahoma City Thunder.
Ito ang unang laro ng Clippers (39-35) matapos magkaroon si star forward Paul George ng knee injury sa nauna nilang 100-101 kabiguan sa Thunder (36-37) dalawang gabi na ang nakakalipas.
Posibleng hindi na makabalik si George sa huling mga laro sa regular season na magtatapos sa Abril 9.
Nagdagdag si point guard Russell Westbrook ng 24 points at 7 assists.
Isinara ng Clippers ang third quarter sa pamamagitan ng isang 27-12 atake para iwanan ang Thunder sa 92-80 papasok sa fourth period.
Pitong sunod na 3-pointers ang isinalpak ng Los Angeles sa pagtatapos ng third at sa pagsisimula ng fourth quarter kasama ang tig-tatlo nina Nicolas Batum at Bones Hyland.
Ang tres ni Leonard ang tuluyan nang nagbaon sa Oklahoma City sa 101-85.
Kumamada si Shai Gilgeous-Alexander ng 30 points para sa Thunder at may 18 at 16 markers sina Josh Giddey at Jalen Williams, ayon sa pagkakasunod.
Sa New Orleans, naglista si Brandon Ingram ng triple-double na 30 points, 11 rebounds at 10 assists sa 115-96 panalo ng Pelicans (36-37) sa Charlotte Hornets (23-51).
Sa New York, isinalpak ni Isaac Okoro ang isang tres sa huling 0.7 segundo sa 116-114 pagtakas ng Cleveland Cavaliers (47-28) sa Brooklyn Nets (39-34).
Sa Orlando, umiskor si rookie Paolo Banchero ng 21 points para sa 111-106 pagdaig ng Orlando Magic (31-43) sa New York Knicks (42-33).
- Latest
