Perpetual, San Beda magkakasubukan uli

MANILA, Philippines — Magtutuos ang nagdedepensang San Beda University at University of Perpetual Help System Dalta ngayong hapon na magsisilbing preview ng kanilang Final Four showdown sa NCAA Season 94 men’s basketball tournament sa The Arena sa San Juan City.

Pasok na sa Final Four ang San Beda (16-1) at Perpetual Help (11-6) kasama ang Lyceum of the Philippines (15-3) at Colegio de San Juan de Letran (13-4) kung saan armado ang Red Lions at Pirates ng twice-to-beat advantage.

Sa kabila nito, inaasahang ibubuhos pa rin ng Red Lions at Altas ang kanilang lakas sa alas-2 na laro upang magkaroon ng magandang momento sa Final Four na magsisimula sa Biyernes sa parehong venue.

Nahirapan ang San Beda na makuha ang 67-65 panalo laban sa Perpetual Help noong Hulyo 7 sa opening day ng liga sa Mall of Asia Arena sa Pasay City.

Magtatagpo naman ang San Sebastian (5-12) at Arellano University (5-12) sa alas-12 habang lalarga rin ang duwelo ng Letran at Benilde sa alas-4. (CCo)