Mga bagong mukha naman ang iluklok sa senado
Pakitaas lang ang kamay, mga kandidatong senador ni Rody Duterte. Sino sa inyo ang mangangakong sasakay ng jetski patungong Sandy Cay, magtatanim doon ng bandila ng Pilipinas, at magdedeklarang “amin ito”?
Pakitaas din ang kamay, mga kandidatong senador ni Bongbong Marcos. Sino sa inyo ang mangangakong tatanggihan at ibubunyag ang anumang pork barrel, maging highway rock nettings, cat’s eyes, at safety roller barriers, o kunwari’y pondong kontra-baha at pang-ayuda?
Sa mga ganyang pangako nasilo nina Duterte nu’ng 2016 at BBM nu’ng 2022 ang boto ng marami. Parehong napako.
Hindi na pwedeng pagtiwalaan ang mga partidong politikal.
Ang Partido Demokratiko Pilipino-Laban ay inagaw lang ng mga bilyonaryong cronies ni Duterte mula kay senador Koko Pimentel. Lumihis na ito sa landas ng yumaong founder Senate president Nene Pimentel na isulong ang demokrasya at kapakanan ng maralita.
Ang Alyansa para sa Bagong Pilipinas ni BBM ay binubuo ng limang partidong pinopondohan ng oligarchs. Ito ang Nacionalista Party, Nationalist People’s Coalition, National Unity Party, Lakas-Christian Muslim Democrats, at Partido Federal ng Pilipinas.
Puro celebrities at tradisyunal na politiko ang mga nasa senatorial tickets ng dalawang paksyon.
May panukala ang mga nagsawa na sa mga ganyang nagnanasang mag-senador: maghalal ng bagong pangalan, at mukha magsapalaran sa mga hindi maka-Duterte o maka-BBM.
Wala namang malaking nagawa ang mga kasalukuyang senador. Naghahangad pang maka-balik senado ang marami sa kanila. Tama na, sobra na, palitan na. Magkakaron ang madla ng bagong pag-asa.
***
Makinig sa Sapol, Sabado, 8-10 ng umaga, DWIZ (882-AM)
- Latest
