Karahasan ay lumalaganap habang palapit ang election
HINDI maganda ang nangyayari sa kapulisan ngayon. Maraming opisyal ang nasisibak sa puwesto. May mga pulis na nasasangkot sa iba’t ibang kaso. Habang papalapit ang May 12 election, kung anu-ano ang kinasasangkutan ng mga pulis at pati opisyal. Mayroong kapo-promote lamang ay sinibak na agad ni PNP chief General Rommel Marbil.
Noong nakaraang linggo, binaril si Albuera, Leyte candidate Sherwin Espinosa habang nagsasalita sa entablado at mga pulis ang kanyang inakusahan. Agad namang nagpahayag si Rep. Richard Gomez na drama lamang itong pagpuntirya kay Espinosa.
Marami nang naganap na pamamaril sa pulitiko at maski sa mga opisyales ng Comelec. Hindi pa nabibigyan ng kasagutan ang pagbaril kay Espinosa, may binaril na namang pulitiko sa Rizal, Cagayan kamakalawa. Kaya dapat kumilos si Marbil para mahuli ang mga salarin.
Labing-anim na araw na lamang at election na at malaki ang posibilidad na marami pang magaganap na patayan. At habang may patayan, talamak naman ang vote buying at vote selling.
Kung hindi kikilos ang PNP tiyak na dadanak pa ang dugo. Samsamin ang mga baril. Tiyak na may private army ang mga pulitiko. Kung hindi masasamsam ang mga baril, tiyak na magiging magulo ang election. Dadanak ang dugo.
Noon pa mang nakalipas na mga election ay maraming nangyayaring kaguluhan. Kasi nga maraming baril na hindi lisensiyado ang hindi nasasamsam. Laganap ang kaguluhan sa North Luzon at sa Mindanao. Dapat bantayan ng Comelec ang mga nasabing lugar para mapigilan ang kaguluhan.
Samantala, habang papalapit ang May 12 election, dapat mag-isip-isip na ang mamamayan ng tamang kandidato na iboboto. Pag-aralan at alaming mabuti ang pagkatao ng iboboto. Kapag hindi naging matalino sa pagboto, tayo ang kawawa sa hinaharap.
- Latest
