EDITORYAL — Hulihin ang ‘utak’ sa Que kidnap-slay
LUTAS na umano ang kaso ng pagkidnap at pagpatay sa Pilipino-Chinese businessman na si Anson Que at drayber nito na Armanie Pabillo, ayon sa Philippine National Police (PNP). Ginawa ng PNP ang pahayag makaraang maaresto ang dalawang suspects sa Roxas, Palawan noong Biyernes Santo. Ang mga naaresto ay sina Richard Austria David at Raymart Catequista. Sumunod na araw (Sabado de Gloria), sumuko naman ang Chinese na si David Tan Liao sa Camp Crame. Ayon sa PNP, inamin ni Liao na sangkot siya sa pagdukot kay Que at iba pang Chinese na maraming utang sa kanilang grupo.
Ayon sa PNP, tiniktikan ng mga suspek ang biktima noon pang Enero ng kasalukuyang taon hanggang isagawa nila ang pagdukot at pagpatay. Dinala umano sa isang safehouse sa Bgy. Langka, Meycauayan, Bulacan, sina Que at Pabillo at saka pinahirapan hanggang mamatay. May mga bakas sa leeg na hinihinalang binigti ang dalawa.
Natagpuan ang bangkay ng mga biktima sa tabing kalsada sa Rodriguez, Rizal noong Abril 9. Nakabalot sa plastic bag ang mga bangkay at naka-duct tape ang mga mukha. Ayon sa PNP, huling nakita ang sasakyan ni Que sa Macapagal Blvd sa Pasay City noong Marso 29. Noong Abril 8, natagpuan ang inabandonang sasakyan sa Seminary Road, Bgy. Bahay Toro, Quezon City. Ayon pa sa pulisya, nagbayad ng P100 milyong ransom ang pamilya ni Que sa kidnappers.
Karapat-dapat papurihan ang PNP sa pagkakaaresto sa tatlong suspects sa pagkidnap at pagpatay kay Que at drayber na si Pabilllo. Pero hindi sila dapat tumigil dito sapagkat mas mahalagang mahuli ang “utak” sa pagkidnap at pagpatay sa mga biktima. Kapag nahuli ang “utak” sa krimen, saka lamang maituturing na lutas na ang kaso.
Sinabi ng PNP na may dalawa pang Chinese na hinahanap kaugnay sa kaso ni Que at ayon sa kanila, maaaring ang mga ito ang “utak” sa krimen. Ayon pa sa PNP, ang dalawang Chinese ay maaaring nakatira sa safehouse sa Meycauayan, Bulacan kung saan itinago at pinatay sina Que at Pabillo.
Nanawagan din ang Federation of Pilipino-Chinese Chambers of Commerce and Industry Inc. na hulihin lahat ang mga suspect sa karumal-dumal na pagpatay. Una na ring nagpahayag ang pinuno ng samahan na nararapat ibalik ang parusang kamatayan laban sa kidnapper. Hindi aniya katanggap-tanggap na nagbigay na ng ransom ang pamilya ng biktima pero pinatay pa rin ito.
Magsagawa pa nang malawakang manhunt ang PNP sa mga “utak” ng pagkidnap at pagpatay kay Que at Pabillo. Matatahimik at mapapayapa ang kalooban ng pamilya at mga kaanak ng biktima at ganundin ang Pilipino-Chinese community kung mahuhuli ang mga nasa likod ng karumal-dumal na krimen.
- Latest
